Anita Pendo wakomerekejwe kenshi yavuze indangagaciro zamwubakiye izina

Mu kiganiro na InyaRwanda, Anita Pendo yatangaje ko yanyuze muri byinshi byabangamiye imwe mu myuga yamenyekanyemo nko kuvangavanga imiziki, kubyina, gutambutsa urwenya, itangazamakuru n'ibindi, ariko agakomezwa n'indangagaciro zamuhinduye ukomeye.

Izo ndangagaciro zamwubakiye ubuzima zamurinze byinshi birimo kubabazwa n'ibimuvugwaho by'ibinyoma, gucika intege n'ibindi byinshi byabaye akiga kubirenza amaso.

Uyu mubyeyi w'umuhanga mu ruhando rw'imyidagaduro mu Rwanda, yatangaje ko hari bimwe byamuvuzweho bikomeye bikamubabaza nko kumwita umutinganyi, kumwibasira bavuga ku buzima bwe bw'urukundo n'ibindi.

Yavuze ko yababajwe n'umuntu wamwise umutinganyi kandi bwari ubwa mbere yumvise iryo jambo mu matwi ye. Avuga ko inkuru zivuga ku rukundo rwe zakabirijwe akibasirwa, kandi kujya mu rukundo no kuruvamo ari ikintu bisanzwe ku bantu bose.

.Indangagaciro zubatse Anita Pendo: 

“ Gukora atagambiriye kwamamara”

Anita ukunze kwiyita umugore wirwanyeho yageze kuri byinshi binyuze mu ndangagaciro

Umunyamakuru Anita Pendo avuga ko yinjiye mukazi ke yifuza kwiyubaka no kureba ku nyungu z'igihe kirekire aho kumara igihe atekereza ku byatuma yamamara no kumenyekana hose.

Atangaza ko yifuje kugira ubumenyi buhagije mu byo akora  akareba niba ibyo ari gukora bimutungiye umuryango, bityo akaba umunyambaraga mu byo akora umunsi ku munsi. Ati " Nabanje kubaka ubumenyi nkareba niba ibyo ndigukora byantungira umuryango, sinite ku kwamamara”.

"Kunyurwa"

Pendo yatangaje ko indangagaciro ya kabiri yamuranze ari ukunyurwa. Umunyamamuru ukorera Ikigo cy’Igihugu cy’Itangazamakuru RBA Anita Pendo, yavuze ko ubuzima bwe bwaranzwe no kunyurwa uko ari no kwakira ubuzima abayeho bigatuma yishimira ibyo afite.

Anita Pendo yagize ati “ Kunyurwa n’urwego ndiho byagiye bimfasha, ngakomezwa no kudatakaza umurongo w’icyo ndiho”.

"Uburere"

Uyu mugore wakunzwe mu mwuga w’itangazamakuru yavuze ko kugendera mu burere yahawe byamurinze ibintu byinshi, bikamurinda kurengera no kwangiza intego ze.

Ati “ Mu byo dukora byose akantu k’uburere uba warahawe gakwiye kuguma muri wowe. Hari imipaka ntagombaga kurenga ku bw’uburere nari narahawe, hari ibyo ntakoraga”.

Yatangaje ko hari byinshi byamuvuzweho bibi abeshyerwa ariko akirengagiza amagambo yose ahubwo agahangayikishwa n’ahazaza yifuzaga kubaka.

Pendo wibasiwe cyane ku buzima bw'urukundo n'ibindi, yavuze ko yize gukomera mu bimubabaza akirengagiza ibivugwa.

Ashimira abanyarwanda bamugiriye icyizere yaba mu bibi no byiza byose yakoze,  ko aho yatsikiye bamufashe  ukuboko  bakamuzamura bakamwereka urukundo.

Anita Pendo yavuze ko uburere yahawe mu bwana bwamurinze ibibi byinshi

Pendo umubyeyi w'abana babiri yanyuzwe n'ubuzima bituma yiyubakira izina mu myuga ye