Ahabanza Imikino

Eric Ten Hag yagize icyo avuga kuri Manchester United ye, atungura benshi

Yanditswe na: ISHIMWE Walter
Taliki:30/11/2023 10:27 0

Eric Ten Hag yanze kugira uwo yegekaho amakosa yo kwitwara nabi kwa Manchester United, avuga ko umusaruro ikipe yagize ariwe uba wawugizemo uruhare.

N' ubwo Manchester United yanganyije na Garatasaray ibitego bitatu kuri bitatu, niyo yari yabanje kuyobora umukino n'ibitego bibiri ku busa.

Nyuma yo gutakaza umukino wo kuri uyu wa Gatatu, Eric Ten Hag na Manchester United, icyizere cyo kuguma mu makipe 16 ya nyuma cyahise kiyoyoka.

Ubwo ikinyamakuru TNT Sports cyabazaga Eric Ten Hag uwo ashinja gutuma atabona amanota atatu, Ten Hag yavuze ko ariwe ukwiye kubibazwa.

Eric Ten Hag yagize ati "Ukwiye kubazwa umusaruro mucye ni njyewe ubwange. Manchester United ni ikipe izaba nziza ariko bitari ibya nonaha. Tugiye kongera imbaraga ku buryo mu gihe kizaza tuzaba beza.

Ku bwange ndabona uko tumeze tudakwiye no gukomeza mu gice gikurikira. Iyo ushaka kuguma muri UEFA Champions League, ntabwo imikino nk'iyi uyitakaza. Buri gihe dutangirana intsinzi mu gice cya mbere, gusa ikibabaje ni uko umukino urangira ari twe dutsinzwe.

Amakipe yose yaducishijemo amaso ko tugira ubwugarizi bujegajega. Twabanje ibitego bibiri kuri Copenhagen birangira idutsinze, none no kuri Garatasaray birangiye tunganyije kandi twabanje ibitego bibiri.

Twagize igihe tuyobora umukino ku bitego bitatu kuri kimwe. Iyo aba ari intsinzi ikomeye ku mukino. Ikibabaje ni uko ikipe yahise iva inyuma ikatwishyura".

Wabaye umukino wa kabiri Manchester United yatakajemo amanota atatu kandi yari yabanje gutsinda ibitego bibiri ku busa. Ubwo yakinaga na FC Copenhagen, yatsinzwe ibitego bine kuri bitatu, kandi Rasmus Hojlund yari yabanje gutsinda ibitego bibiri.

Ku mukino wa Garatasaray, byageze ku munota wa 19 Bruno Fernandez na Alejandro Garnacho bamaze gutsindira Manchester United ibitego bibiri ku busa bwa Garatasaray. Umukino warangiye amakipe yombi anganya igitego bitatu.