Ahabanza Imikino

Sandro Tonali wihebeye imikino y'amahirwe ake kashobotse

Yanditswe na: ISHIMWE Walter
Taliki:27/10/2023 10:45 0

Ishyirahamwe ry'umupira w'amaguru mu Butaliyani, ryafatiye ibihano Sandro Tonali umutaliyani ukina muri Newcastle United kubera guhamwa n'icyaha cyo gutega kandi bitemewe ku bakinnyi.

Ishyirahamwe ry'umupira w'amaguru mu Butaliyani ryafashe umwanzuro wo guhagarika Sandro Tonali amezi 10 adakina umupira w'amaguru. Ni nyuma y'uko nta gihe kinini yari amaze asinyiye Newcastle United yo mu Bwongereza.

Nihatabaho uguca inkoni izamba, Sandro Tonali w'imyaka 23 y'amavuko azagaruka mu kibuga mu kwezi kwa Kanama 2024. Ubwo bisobanuye ko atazakina Euro ya 2024 mu gihe ikipe y'igihugu y'u Butaliyani yaba iyitabiriye.

Mu mpeshyi ni bwo Newcastle United yaguze Sandro Tonali miliyoni 55€ imukuye muri AC Milan yo mu Butaliyani. Intego nyamukuru Newcastle United yari yaguriye Sandro Tonali ni ukuyifasha mu mikino ya UEFA Champions League.

Ibihano bya Sandro Tonali, bije nyuma y'icyumweru kimwe gusa na Nicolo Fagioli wa Juventus ahanishijwe kumara amezi arindwi adakina.

Ishyirahamwe ry'umupira w'amaguru mu Butaliyani, nyuma yo gufatira ibihano Nicolo Fagioli na Sandro Tonali, ubu risigaye muri dosiye ya Nicolo Zaniolo. Uyu mukinnyi nawe yakuwe mu ikipe y'igihugu y'u Bbutaliyani icyarimwe na Tonali bashijwa ibyaha bimwe.

Sandro Tonali imyaka itatu yamaze muri AC Milan mbere yo kujya muri Newcastle, yifashije iyi kipe gutwara Serie A ya 2021-2022 ndetse no mu mwaka w'imikino wa 2022-2023 ayifasha kugera muri kimwe cya kabiri cya UEFA Champions League.

Sandro Tonali aheruka gukinira Newcastle United mu mukino wa UEFA Champions League, ubwo Newcastle United yatsindwaga na Brussia Dortmund igitego kimwe ku busa. Muri uyu mukino Tonali yasaga nk'aho ari gusezera gukina muri uyu mwaka, yinjiye mu kibuga asimbuye.

Kuva yagera muri Newcastle United, Sandro Tonali ahagaritswe gukina yari amaze kuyikinira imikino 12.

Alan Shearer wabaye rutahizamu w'ibihe byose muri English Premier League by'umwihariko muri Newcastle United, yatangarije Radio BBC 5 ko Newcastle yiteguye gufasha Sandro Tonali mu bihe bitoroshe agiye kumarana amezi 10.