Imikino ya 'Saza Neza' yasojwe, igikombe kibona nyiracyo

Ku cyumweru tariki 22 Ukwakira 2023 kuri sitade y'akarere ka Bugesera habereye imikino ya nyuma y'iri rushanwa rya 'Saza Neza'. Ku ikubitiro Saa sita zuzuye habanje umukino wo guhatanira umwanya wa 3, Cyeru FC inyagira Bugesera Veterans ibitego 4-0, ihita iwegukana gutyo 

Nyuma yaho saa cyenda zuzuye ni bwo umuriro watangiye kwaka hakinwa umukino wa nyuma, Magic SA ibyitwaramo neza itsinda igitego 1-0 Bakambwe FC gitsinzwe na Habimana Hussein, iba yegukanye igikombe gutyo.

Umuyobozi ushinzwe siporo mu karere ka Bugesera wari waje kuri iyi mikino ahagarariye umuyobozi w’Akarere Mutabazi Richard utarabashije kuboneka, yavuze ko yamutumye ngo ashimire uwagize igitekerezo cyo kuzana iri rushanwa ndetse ko rigomba no kujya mu yo basanzwe bategura.

Yagize ati: "Ntabwo umuyobozi w'akarere kacu yabonetse, gusa yantumye gushimira cyane uwagize igitekerezo cyiza cyo gutegura irushanwa nk'iri. Byari bikenewe kuba habaho irushanwa ry'abagana mu zabukuru nk'uko dutegura ayandi marushanwa nka Kagame Cup ndetse n'andi

Ndetse yavuze ko abashyigikiye kandi iri rushanwa rigiye kujya mu yandi marushanwa akarere gategura buri mwaka, rijye riterwa inkunga dufatanyije na Magic Sports Association kugira ngo rirusheho gutegurwa neza cyane".

Iri rushanwa ryagaragayemo abakinnyi bakiniye Amavubi nka Ndayishimiye Eric Bakame na Ndahinduka Michel wamamaye nka 'Bugesera' ni ubwa mbere ryari ribaye, ariko rigomba kuzajya rikinwa buri mwaka.

Rihuza abafite imyaka 30, rikaba ritegurwa na Magic Association yashinzwe na Habimana Hussein wahoze ari umuyobozi wa tekiniki w'ishyirahamwe ry'umupira w'amaguru mu Rwanda "FERWAFA".

Rifite intego zitandukanye zirimo kurwanya indwara ziterwa no kudakora siporo ndetse no gukangurira abantu gahunda ya 'TunyweLess'.

Ikipe ya Magic SA niyo yegukanye igikombe

Kapiteni wa Magic SA, Habimana Hussein ashyikirizwa igikombe 

Iri rushanwa rizajya riba buri mwaka