Rio Kapadia wamenyekanye nka Chak The India yitabye Imana ku myaka 66

Rio Kapadia w’imyaka 66 benshi bamenye nka Chak De India, Dil Chahta Hai ndetse na Mardaani, yitabye Imana nk'uko byatangajwe n’inshuti ye magara Faisal Malik.

Faisal Malik yatangarije India Today ko uyu mukinnyi wa filime yamaze gushiramo umwuka.

Nubwo icyamwishe cyagizwe ubwiru, benshi mu bakunzi be harimo n’abakundaga uko agaragara akina, banditse ubutumwa ku mbuga nkoranyambaga bamwifuriza kuruhuka mu mahoro.

Nyuma yo kumva inkuru mbi ivuga ko Rio yatabarutse, byatangajwe ko umuhango wo guherekeza umubiri we uzaba kuya 15 Nzeri 2023 i Shiv Dham Shamshan Bhumi.

Uretse kuba yarakinnye filime zitandukanye, nyakwigendera yagaragaye no muri filime z’uruhererekane zacishwaga ku ma televiziyo yo mu Buhinde.

Mu mwaka wa 2012 mu kiganiro n'itangazamakuru, yavuze ku bibazo bigera ku bakinnyi b’ama filime biterwa no kutitabwaho n’abakoresha babo, bigatuma iterambere ryabo ridindira ntirikure, asaba ko bajya bashyigikirwa,n’uburenganzira bwabo bukubahirizwa.

Yarangwaga n'ishyaka ryo gufasha abandi no kumva yatabara buri wese ufite ikibazo, ndetse akarangwa n'ukuri

Bamwe bavuze ko ashobora kuba yahitanywe n’indwara ya Kanseri, nyamara byatangajwe n’inshuti ye magara ko icyamwishe kitari cyamenyekana.

Abakunzi ba filime zikorerwa mu Buhinde bakomeje kubabazwa cyane no kubura umwe mu bakinnyi wabashimishaga, ndetse agatuma babona impamvu zo kureba filime! Benshi batangaje bati “Ntituzamwibagirwa, aruhukire mu mahoro”.