Europe Tour: James na Daniella bakomereje urugendo rwabo muri Poland

James na Daniella bakunzwe mu ndirimbo zitandukanye zirimo "Mpa amavuta", "Narakijijwe", "Barihe" n'izindi, berekeje mu Burasirazuba bwo hagati mu Burayi aho bagiye gutaramana n’abanyarwanda ndetse n’abakunzi babo bahatuye.

Mu kiganiro na inyaRwanda, Pastor Steven Ntwari umuyobozi wa Rwanda Christian Fellowship Poland itsinda ry'abakirisitu batuye muri Poland, yadutangarije ko bari bamaze igihe kinini bifuza kuzatumira James na Daniella dore ko bahafite umubare munini w'abakunda ibihangano byabo.

Ati: “Ni umugisha ukomeye kwakira aba bakozi b’Imana mu gihugu cyacu hano, yego ntabwo turi benshi cyane ugeraranije n'ibindi bihugu duturanye, ariko kandi turi umubare uhagije wo kuba twatumira uwo ariwe wese kuza kubana natwe mu materaniro dukunze kugira nk’abanyarwanda batuye inaha. Twizeye ko imitima izahembuka, abakizwa bakiyongera ndetse tukagura ubwami bw’Imana aho turi hose".

Yakomeje agira ati: “Twategereje gutumira James na Daniella, kubera ko ari abaramyi beza, bafite ubutumwa bwiza, Imana yahagurukije muri iki kiragano cyacu, ndetse kandi ni n'abaramyi urubyiruko rwinshi rukunda, runigiraho byinshi.

Ni muri urwo rwego rero twifuje ko batugenderera kugira ngo bakore iryo vugabutumwa bwiza bwa Kirisitu, ndetse banatere ishyaka n'umuhate byo gukorera Imana no gutera ikirenge mu cyabo urwo rubyiruko rwo muri Poland ndetse n'abakuze tutabibagiwe kuko gukorera Imana ntibigira imyaka.”

Ati "Icyo twiteze muri urwo ruzinduko rwabo bazagirira ino, ni uko ubutumwa buzavugwa binyuze mu bihimbano byabo by'Umwuka, hakabaho kwidagadura, gusangira no gusabana bya Gikristu, hakabaho no guhindurira benshi kuba abakristu bahamye kandi babikorana umwete, kuko icyo tudashidikanya ni uko umubare w'abazitabira uzaba ari mwinshi".

Iki gitaramo kigiye guhuriza hamwe abanyarwanda baturutse mu mijyi itandukanye kizaba tariki 04 Kanama 2023 kuva saa 10:00 z’ijoro kugeza saa 04:00 mu rukerera ibyo bakunze kwita "Overnight". Kizabera mu rusengero rwa Redeemed Christian Church of God (RCCG) Kopijinikow 45 mu murwa mukuru wa Poland. Bikaba bitangazwa ko kwinjira muri iki gitaramo bizaba ari ubuntu.

Mu Budage ni hamwe mu ho James na Daniella bataramiye berekwa urukundo rwinshi

James na Daniella ubwo batemberaga mu Bufaransa

Pastor Steven Ntwari umuyobozi wa Rwanda Christian Fellowship Poland yatumiye James na Daniella

James na Daniella bagiye gutaramana n'abauye muri Poland