Jakaya Kikwete wari Perezida wa Tanzania yatanze inama ku rubyiruko mu kwirinda Virusi itera SIDA

Uwahoze ari perezida wa Tanzania mu 2005-2015, Jakaya kikwete, yibukije urubyiruko kwirinda igihe cyose bakora imibonano mpuzabitsina,kuko indwara zikomeje kwiyongera,ndetse na SIDA ikaba yiganje mu rubyiruko rw'ubu.

Mu bukangurambaga buyobowe na Geita Gold Mining Limited ( GGML ) ku bufatanye na Komisiyo ya Tanzaniya ishinzwe kurwanya SIDA ( TACAIDS ),bwari bugamije gukusanya inkunga yo gushyigikira ikigega cyo kurwanya SIDA,Kikwete yahamagariye urubyiruko kwirinda kwishora mu ngeso z’ubusambanyi kuko SIDA igikomeje guhitana benshi barimo n’urubyiruko ndetse n’abandi batandukanye.

Ku nsanganyamatsiko yiswe “GGML Kili Challenge”urubyiruko rwabwiwe ko rukwiye kubaho ubuzima bufite intego,kandi bakirinda kwangiza ubuzima bwabo bishora mu mibonano mpuzabitsina idakingiye,kuko yica ahazaza habo n’inzozi zabo.

Ibirori byabereye ku irembo rya Machame muri Hai, mu karere ka Kilimanjaro,ku ntego yo kwamagana SIDA kandi baharanira intego bihaye yo kurandura SIDA burundu kugeza mu mwaka wa 2030.

Kikwete yashimye GGML kuba yerekanye inzira yo kurwanya Virusi itera SIDA mu rubyiruko,ndetse ashimira ubukangurambaga bukorwa bwita ku buzima bw’urubyiruko nk’imbaraga z’igihugu n’Isi muri rusange nk'uko bitangazwa na The Citizen yo muri Tanzania .

Umuyobozi mukuru wa GGML, Terry Strong yashimiye guverinoma ku nkunga yabo mu kwamagana Virusi itera SIDA no gukangurira urubyiruko mu kuyirinda bazibukira imibonano mpuzabitsina idakingiye ndetse no kwirinda kwiyandarika.

Jerome Kamwila, Umuyobozi w'agateganyo wa TACAIDS, yavuze ko bazakomeza gufatanya na GGML kugira ngo intego bihaye yo kurandura SIDA igerweho,ndetse barandure burundu imfu ziterwa nayo bitarenze umwaka wa 2030.