Suède: Amb. Diane Gashumba yakiriye James na Daniella mbere y’igitaramo-AMAFOTO

Kuri uyu wa Kane tariki 6 Nyakanga 2023, nibwo Amb. Diane yakiriye James na Daniella mbere y’uko bakorera igitaramo gikomeye mu Murwa Mukuru w’Iki gihugu, Stockholm utuwe n’abaturage barenga 975,551 nk’uko bigaragazwa n’imibare ya Banki y’Isi yo mu Ukuboza 2020.

James na Daniella banditse kuri Instagram bashima byimazeyo uburyo bakiriwe muri Ambasade y’u Rwanda muri Suède, bateguza igitaramo cyihariye bazakorera mu Mujyi wa Stockholm, ku wa Gatandatu tariki 8 Nyakanga 2023.

Mu butumwa yanyujije kuri Instagram, Amb. Diane yavuze ko yishimiye guha ikaze James na Daniella muri Suede, kandi abashimira kuba basuye Ambasade y’u Rwanda. Ati “Ndabifuriza kugubwa neza.”

Iri tsinda rimaze iminsi mu bitaramo bikomeye ku Mugabane w'u Burayi. Ku wa 1 Nyakanga 2023 bataramiye muri Finland, ku wa 8 Nyakanga 2023 bategerejwe muri Suède, ku wa 15 Nyakanga 2023 bazataramira muri Germany, ku wa 29 Nyakanga 2023 bataramire Denmark, bazasoreza mu Bubiligi ku wa 5 Kanama 2023.

Imyaka itatu irashize James na Daniella bari mu muziki w’indirimbo ziramya zigahimbaza Imana. Iherekejwe n’indirimbo zomoye imitima ya benshi, binyuze mu bihangano bagiye bakubira kuri album zitandukanye.

James asobanura ko imyaka itatu ishize bari mu muziki irimo amasomo menshi. Avuga ati “Imyaka yo irimo amasomo menshi ku buryo twasaba ko twafata n'undi mwanya umuntu agafata n'ikaramu cyangwa se ingwa akajya ku kibaho akandika ibintu byinshi. Imana yatwigishijemo ibintu byinshi, yatwigishirijemo abantu...

Iri tsinda riri gukorera ibitaramo mu Burayi, nyuma yo gukorera igitaramo abanya-Kigali bise ‘'Gathering of 1000 Special Extended Worship Live Concert' cyabereye muri Kigali Convention Center’, ku wa 4 Kamena 2023.

Iki gitaramo bagikoze nyuma y’imyaka itatu yari ishize abakunzi b’abo babategereje, nyuma y’igitaramo bakoreye muri BK Arena mu 2020.

Muri Kamena 2021, nibwo Dr. Diane Gashumba yagizwe Ambasaderi w’u Rwanda muri Suède. Mu kiganiro aherutse kugirana na InyaRwanda, yavuze ko icyizere Perezida Kagame yamugiriye ‘ari inshingano ziremereye’.

Yavuze ko yakiranye ibyishimo izi nshingano yahawe. Kandi ko  Perezida Kagame yamubonyemo umusanzu yatanga nyuma y’abandi bamubanjirije. Ati “Ni inshingano nakiriye n’ibyishimo. Ariko nanone no kumva yuko nyine ngomba gukoresha imbaraga zose kugirango ubutumwa yampaye mbusohoze neza.”

Yavuze ko Abanyarwanda batuye muri ibi bihugu bakunda igihugu cyabo (U Rwanda), bakarangwa no gukora cyane.

Si ubwa mbere Dr. Diane yakiriye abahanzi, kuko mu bihe bitandukanye yakiriye abarimo Patient Bizimana, Israel Mbonyi, Bruce Melodie n’abandi.

Gashumba avuga ko akunda indirimbo zubakiye ku muco w’u Rwanda. Kandi, akunda abahanzi barimo Cecile Kayirebwa. Ati “Indirimbo za Kayirebwa ziramfasha cyane kuruhuka mu mutwe... Ariko nkunda n’abandi bahanzi benshi.”

Anavuga ko akunda ibihangano by’abahanzi barimo Masamba Intore na Jules Sentore. Dr Gashumba yavuze ko ashingiye aho bigeze, abahanzi bo mu Rwanda bari gutera imbere, anashingiye ku bitaramo bagenda bakorera ahantu hanyuranye. 

James na Daniella bishimiye kugirana ibiganiro na Ambasaderi w'u Rwanda muri Suède, Dr Diane Gashumba unareberera inyungu zarwo mu bihugu birimo Norvège, Finland, Danemark na Iceland

Ambasaderi w'u Rwanda muri Suède, Dr Diane Gashumba yahaye ikaze James na Daniella muri Suède n’itsinda ry’abacuranzi babafasha muri ibi bitaramo

Ku wa 8 Nyakanga 2023, James na Daniella bazakorera igitaramo mu Mujyi wa Stockholm

James na Daniella baherutse gukorera igitaramo gikomeye muri Finland 

KANDA HANO UREBE AMASHUSHO Y'INDIRIMBO 'BARIHE' YA JAMES NA DANIELLA

">