Amavu n’amavuko y’itsinda rya Hymnos ryamamaye mu ndirimbo 'Ndamahoro'-AMAFOTO

Itsinda rya Hymnos rigizwe na Mugiraneza Naomi na Dieumerci Dedo rizwi mu ndirimbo ziramya Imana, rigiye gukora igitaramo cya mbere muri Kigali, kizamurikwamo album yabo “Hymnos 6 album Live Concert”.

Iki gitaramo kizaba kuwa 22 Kamena 2023 muri Crown Conference Hall Nyarutarama mu mujyi wa Kigali. Ni cyo gitaramo cya mbere bazaba bakoze nyuma y'uko bashinze iri tsinda rya Hymnos.

Mu gusobanura uko bakoze iri tsinda rya Hymnos, Dedo na Naomi batangaje ko bahujwe n’umwuka w’Imana kuko bari basanzwe baziranye ari inshuti za hafi, Dedo aririmba muri Gisubizo Ministry naho Naomi ariririmba muri True Promises ariko bakaza guhinduka itsinda nk’iri.

Aba baramyi bavuze ko batazaba bari bonyine muri iki gitaramo, kuko bazafatanya na Dr Ipyana uturuka mu gihugu cya Tanzania, bakaba bazafatanya kuramya Imana nk'uko nawe ubwe yabyitangarije.

Dr Ipyana, yavuze ko nawe yabamenye binyuze mu ndirimbo zabo bakoze, akifuza guhura nabo. Yatangaje ko iyi nshuro ari iya kabiri aje mu Rwanda ndetse ko yakunze abaramyi bo mu Rwanda, by'umwihariko Hymnos.

Dr Ipyna yagize ati “Guhura n’iri tsinda byakozwe na Mwuka Wera”

Dr Ipyana azafatanya n’iri tsinda mu guhimbaza Imana, ndetse bijeje abakunzi b’indirimbo ziramya Imana ko bazafatanya kuvuga kugira neza kwayo.

Naomi uri mu myiteguro y’ubukwe bwe muri Kanama, yavuze ko bitamugora gufatanya imyiteguro y’ubukwe n’igitaramo. 

Avuga ko Imana imushoboza gutunganya buri kimwe. Yavuze ko kandi album ya 6 idasanzwe. Ati “Album ya 6 irimo ubutumwa bwiza kandi bwinshi, abo tuzabana muzabyibonera”.

Umuhanzi Dedo yavuze ko biteguye bihagije kandi ko bazaramya Imana, bakayirirmbira, ndetse bakamurikira abakunzi babo iyi album nshya ya 6.

Ubwo basobanuraga impamvu bazashyira ahagaragara album ya 6 mbere ya album ya 4 n'iya 5, bavuze ko zo zikiri gutunganywa kandi ko nazo zizamurikwa nizirangira gutunganywa.

Mu kiganiro n’itangazamakuru, batangaje ko imyiteguro irimbanije kandi ko bafite byinshi bazasangiza abakunzi babo bazitabira iki gitaramo cyo kuramya Imana.

Basabye abakunzi b’indirimbo ziramya Imana kuzitabira ari benshi, kandi ko biteguye kugirirwa neza n’Imana kuri uyu munsi w’amateka mu buhanzi bwabo nka Hmnos. 

Dedo yavuze ko bazishimira gutaramira abakunzi babo kandi ko bazagira ibihe byiza

Naomi uri no mu myiteguro y'ubukwe yavuze ko ntacyamubuza guhimbaza Imana

Dr Ipyana yaje mu Rwanda yitabiriye igitaramo cy'iri tsinda bazafatanya kuramya Imana

Batangaje ko igitaramo bagiteguye kera kandi ko biteguye kugirirwa neza n'Imana

REBA INDIRIMBO "NDAMAHORO" YATUMYE BAMAMARA