Real Madrid yibuze! Abakinnyi 11 bitwaye neza kurusha abandi muri Champions League

Ku rutonde rw'abakinnyi bahize abandi muri iri rushanwa riraza amajoro benshi ku Isi, umubare munini ni uwa Manchester City ishobora gutwara ibikombe 3 muri uyu mwaka w'imikino ndetse na Inter Milana izakina umukino wa nyuma kuwa Gatandatu.

Aba bakinnyi 11 batoranyijwe n'ikinyamakuru The Sun ni aba bakurikira:

Andre Onana

Kugira ngo ikipe yubake uburyo bwo gutsinda bihera ku muzamu. Uyu akina mu izamu rya Inter Milan. Nubwo Ederson wa Manchester City yagize ibihe byiza, ariko ntabwo yarusha Onana kubera ko yagiye afasha ikipe ye cyane kutinjizwa. 

Uyu muzamu mu mikino ya Champions League, yakinnye muri uyu mwaka w'imikino, yarinze izamu rye kutinjiramo igitego ku kigero cya 75%. Kwitwara neza kwa Andre Onana muri Champions League y'uyu mwaka ni byo biri gutuma ikipe ya Manchester United, Chelsea na Tottenham ziri kumushaka ngo zimugure.

Federico Dimarco

Federico Dimarco ntabwo azwi cyane mu ikipe ya Inter Milan ariko uburyo akinamo ku mwanya we akina inyuma ku ruhande rw'ibumoso ni byo bifasha iyi kipe gukora uburyo bw'ibitego. 

Akamaro ke muri Inter Milan cyane ntabwo ari ukugarira ahubwo ni ugushaka uburyo bwavamo igitego. Mu mikino y'uyu mwaka ya Champions League yakinnye inshuro 10 atanga imipira 5 yavuyemo ibitego byagize akamaro gakomeye cyane none ubu Inter Milan iri ku mukino wa nyuma.

Alessandro Bastoni

Alessandro Bastoni ni umukinnyi w'imyaka 24 akaba akina inyuma ku ruhande rw'iburyo (right back), bitewe n'ubuhanga afite mu mwaka ushize yanze kujya mu makipe akomeye yamushakaga arimo Tottenham. Yashakaga kwigumira muri Inter Milan kugira ngo ayishakire ibikombe dore ko ariyo kipe y'iwabo ndetse akaba ari nayo yakuriyemo.

Alessandro Bastoni afite uruhare runini kuba Inter Milan iri ku mukino wanyuma wa Champions League, mu mikino 11 yakinnye yafashije ikipe ye kutinjizwa igitego imikino 8 ndetse yewe yanatanze imipira 3 yavuyemo ibitego.

John Stones

Gushyira John Stones mu ikipe y'umwaka ya Champions League, ntabwo waba wibeshye bitewe n'akazi gakomeye yakoze. Ubusanzwe akina inyuma hagati (Centre-back) ariko umutoza we yagiye akunda kumukinisha no mu kibuga hagati yugarira kandi naho akahakina neza cyane.

Ubufatanye bwe na Kayle Walker bakinana muri Manchester City ni byo byatumye Vinicius Junior atabona ibitego bya Real Madrid mu mukino wo kwishyura wa 1/2. 

Undi mukino wahiriye John Stones ni uwo batsinzemo Bayern Munich ibitego 3-0. Mu mikino 7 ya Champions League yakinnye, yafashije ikipe ye kutinjizwa igitego imikino 4.

Rúben Dias

Rúben Dias ni umwe mu bakinnyi bagize uruhare rukomeye mu kuba Manchester City iri ku mukino wa nyuma wa Champions League. Mu mikino 12 ikipe ye yakinnye, yakinnyemo imikino 11. Ubwo bivuze ko umwe gusa atariwo yakinnye. Yafashije Manchester City kutinjizwa cyane cyane ku mukino batsinzemo Bayern Munich ibitego 3-0 ndetse na Real Madrid ibitego 4-0.

Rodri

Byakugora kubona undi mukinnyi ukina mu kibuga hagati witwaye neza kurusha Rodrigo mu mu mikino ya Champions League y'uyu mwaka, haba uburyo atangamo imipira ndetse no kugena umuvuduko umukino ugenderaho.

Yatsinze igitego kimwe mu mikino ya Champions League yakinnye, ni igitego yatsinze Bayern Munich arekuye ishoti riremereye mu mukino ubanza wa 1/4.

Bernado Silva

Nubwo uyu mukinnyi yagiye akunda kwisanga yakinishijwe ku ruhande rw'iburyo ariko uyu nawe ni undi mukinnyi ukina hagati mu kibuga witwaye neza cyane kurusha abandi. 

Bernado Silva muri Champions League yatsinze ibitego 3 kandi yabitsinze amakipe akomeye gusa ndetse yanatanze umupira umwe wavuyemo igitego. Yigaragaje cyane cyane ku mukino wo kwishyura wa Real Madrid aho yitsinze ibitego 2-0 ndetse akaba ari nawe uba umukinnyi w'umukino.

Kevin De Bruyne

Uyu mukinnyi ukomoka mu Bubiligi akina mu kibuga hagati mu ikipe ya Manchester City. Nta gushidikanya ko kuba Manchester City iri ku mukino wa nyuma wa Champions League, Kevin De Bruyne yabigizemo uruhare rukomeye cyane. Niwe watsinze igitego 1 ku mukino ubanza wa Real Madrid muri 1/2.

Muri rusange mu mikino ya Champions League muri uyu mwaka Kevin De Bruyne yatsinze ibitego 2 ndetse anatanga imipira 7 yavuyemo ibitego.

Rafael Leao

Mu rwego rwo kugira ngo iyi kipe itiharirwa n'abakinnyi ba Manchester City, Rafael Leao wa AC Milan yaba akina ku murongo w'imbere ku ruhande rw'iburyo. Ikipe ya AC Milan inejejwe no kuba yarongereye amasezerano y'imyaka 5 rutahizamu wabo Rafael Leao bitewe n'ubuhanga bwe.

Uyu mukinnyi yagize uruhare rukomeye kugira ngo ikipe ye ya AC Milan igere muri 1/2 kuko yatsinze ibitego 6. Ku mukino ubanza wa 1/2 batsindwa na Inter Milan ntabwo yari ahari bitewe n'ikibazo cy'imvune gusa ntawe ushidakanya ko iyo aza gukina aba yarazonze Inter Milan ndetse no kuyitsinda bikaba byashoboka.

Erling Haaland

Nta gishya kuba uyu mukinnyi ari mu ikipe ya Champions League y'uyu mwaka dore ko ari nawe uyoboye abandi ba rutahizamu bose mu gutsinda ibitego byinshi. Yatsinze ibitego 12 ndetse yanashyizeho agahigo umunsi atsinda RB Leipzig ibitego 5 wenyine muri 1/8.

Vinicius Junior

Uyu munya-Brazil ukina anyura ku ruhande rw'ibumoso, niwe mukinnyi wa Real Madrid wenyine ugaragara muri iyi kipe y'abakinnyi 11 bitwaye neza kurusha abandi muri Champions League y'uyu mwaka. Mu mikino 12 yakinnye, yatsinzemo ibitego 7 ndetse anatanga imipira 5 yavuyemo ibitego.