Ese iturufu yo kubaho nka kibona umwe Yolo yahisemo irarya? Ibyamamare byayitoye bibivugaho iki?

Yolo The Queen ni umukobwa ubona ko ari mu myaka itari hejuru kandi ntibe no hasi cyane ya 25. Ubwamamare bwe bwavuye ku miterere ye itangaje yagiye ishimwa na benshi barimo ibyamamare nka Drake na Harmonize.

Kuri ubu yongeye kuvugwa biruseho kuva umwaka watangira, Harmonize agatangira kumwiyegereza cyane kugera n'ubwo atoboye akamubwira ko amukunda kandi yifuza ko bajya mu rukundo mu buryo bweruye.

Nubwo uyu mukobwa nta jambo aravuga ryemeza ko yaba na we amukunda, ntibyabujije bimwe mu binyamakuru byo mu Karere byiganjemo ibyo muri Tanzania, kwandika ko ari umukunzi we.

Hagati aho ariko uyu mukobwa ni ibintu bicye bizwi ku buzima bwe aho n’amazina ye asanzwe ntawari uyazi, ahubwo akaba ari we wayatangaje mu minsi micye ishize binyuze ku rubuga rwe rwa Instagram rukurikirwa n’ibihumbi birenga 316, ari narwo rwonyine yemeza ko akoresha, izindi ari izo bamwitirira.

Uyu mukobwa mu byo yavuze ko akunda harimo indirimbo za Ish Kevin ariko hari n'igihe indirimbo za The Ben zamusazaga cyane. Yanahishuye ko yize mu mashuri yisumbuye muri King David na Amie Des Enfants, kuri ubu akaba akora ubucuruzi bwo kuri murandasi.

Yavuze kandi ko atuye i Nyamasheke ariko ibyo byose nubwo abitangaza amatsiko akomeza kuba menshi umunsi ku wundi ku birebana na we dore ko nta birori nta n’ikinyamakuru na kimwe kirabasha kumufatisha ngo abe yagiha ikiganiro.

Avuga ko atajya akora ibintu bitamufitiye inyungu kuko ngo ibyo binyamakuru biba byinjiza we ntacyo yinjiza.

Uyu munsi, InyaRwanda twifuje kubagezaho inkuru igaruka ku mpamvu zitandukanye zitera bimwe mu byamamare kutagaragara mu bitangazamakuru.

Bamwe mu bagize icyo babitangazaho barimo Beyonce, Nicolas Cage na The Weekend. Usanga bigoranye kubona ibiganiro byabo. Ibi byamamare byagiye bitangaza impamvu zibatera kuba batagaragara cyane mu bitangazamakuru.

Abenshi muri bo nubwo badakunze kuvuga mu itangazamakuru, ntibibabuza kumenyekanisha ibyo bakora cyane ko kuri ubu imbuga nkoranyambaga zoroheje ibintu, icyo umuntu yifuje gutangaza akoresha urukuta mu minota micye kikaba kigeza ku bo ashaka.

Ibi binyuranye cyane no mu bihe bya cyera aho abantu byagoranaga kugira aho bamenera niba batabashije kubona ibiganiro kuri televiziyo, radiyo, ibinyamakuru byandika n’ibindi.

Zimwe mu mpamvu twabakusanyirije tugendeye ku bitekerezo by'abahisemo inzira ya kiyolo [kuba kibonumwe], harimo kuba gusa yumva bitamurimo kugaragara mu birori n’ibikorwa bihuza abantu benshi no gutanga ibiganiro.

Harimo kandi kuba abona ntacyo byakongera ku byo akora mbega abona nta nyungu abitegerejemo cyane, Kuri ubu abantu benshi bayobotse inzira yo kwirebaho mbere yo kureba ku bandi, ni mu gihe kuko abantu ba none bakunda icyo ufite kurusha wowe nyawe.

Ubusesenguzi buhwitse n'ubudahwitse bukurikira ibiganiro bamwe batanga, nabwo butera bamwe kumva batisanzuye kuba bagira icyo bavuga. 

Impamvu ni uko baba bakeka ko nibavuga ururimi rw’amahanga bashobora kuba igitaramo, hagira uwayura imbere ya camera agakorwamo ‘meme’, bakibaza icyo bavuga icyo ari cyo, akaba ari byo bibatera kwigengesera.

Kwifuza ko abantu bakomeza kubibazaho cyane ko burya umuntu ashobora kuba agukunda mutarahura mutaranaganira, ariko mwahura bigashira, icyo gihe rero niba ariyo turufu ikomeye warishaga/yatumaga ucuruza, uhita uva mu kazi.

Kuba yumva ntacyo afite kuvuga hirya y'ibyo akora cyane ko byinshi mu biganiro binarenga ku kazi umuntu akora bikinjira mu buzima bw’umuntu bwite kandi we yumva atiteguye kuba yabivugaho cyangwa yakwepa kubivugaho.

Imyifatire idahwitse biyiziho cyane iyo bigeze mu gihe cyo gusubiza bimwe mu bibazo bisa nk’ibikomeretsa, aha naho ni ahantu h’ingenzi hatuma bamwe babyirinda kuko bazi ko batari intyoza mu biganiro, aho bifitemo ubupfura cyangwa mu yandi magambo impano yo kuvuga ntayo bigiramo.

Kudashaka gusumba ibyo bakora ahubwo bashaka ko ari byo biza imbere yabo, ikintu gikunze kugarukwaho n’ibyamamare bitandukanye, ni ingingo yatumye kugeza ubu imyaka ibaye myinshi Beyonce nta kiganiro agaragaramo.

Kuba barakoze cyane rimwe na rimwe banasaba ibyo biganiro bakabyimwa bamara kugerayo bagakomeza gushyira intera hagati yabo n’ibitangazamakuru.

Rero ni inzira itari mbi kuba umuntu yafata umwanzuro ku buzima bwe wo kutagira icyo atangaza binyuze mu nzira ikoresha benshi, akareka ibikorwa bye bikaba ari byo byivugira kuko wa mugani wa Beyonce abantu bakunda ibyo ukora.

Hari abantu usanga bashaka kwamamara cyane kurusha ibyo bamamaza, ugasanga umukinnyi wa filime, umunyamideli, umuhanzi mu buryo butandukanye, ashaka gusumba ibyo akora kandi ibyo akenshi bitumuka nk’ivu.

Igihari kandi na none ni uko benshi mu bayobotse inzira yo kuvuga bicye bagakora byinshi, babashije kugera kure cyane mu ruhando rw’imyidagaduro nyarwanda, ibihamya birahari bitari Yolo hari n’abandi.

Gusa na none gutanga ibitekerezo no kuganiriza abantu mu buryo bumwe n’ubundi, hari icyo byungura umuryango mugari uba unakunda ibyo ukora n'uko ubikora, hari uburyo bumwe n’ubundi wakwigiraho uko witwara n’ibindi.Bamwe bibaza niba abaho! Gusa abaho n'uko atari umuntu w'ibirori n'itangazamakuru cyaneHari ibyamamare byatoye iturufu ya kiyolo [kuvuga macye] kandi bageze kure mu byo bakora Imiterere ye ivugisha abatagira ingano bamwe bagenda banibaza ikindi akora gituma abaho ubuzima buhenze. We yavuze ko akora ubucuruzi bushingiye ku ikoranabuhanga yewe akaba aheruka no kwerekana umuturirwa arimo kuzamura ahantu atasobanuye neza