Chrisy Neat yasubiyemo indirimbo "Urukundo" ya Rugamba Sipiriyani-VIDEO

Umuhanga mu gutunganya amajwi y’indirimbo akaba n’umuhanzikazi, Chrisy Neat, yasubiyemo indirimbo yahimbwe na nyakwigendera Rugamba Cyprien, maze ayitunganya mu buryo budasanzwe bunogeye amatwi.

“Urukundo” ya Rugamba ni indirimbo yakunzwe na benshi ariko biba akarusho ubwo Chrisy Neat yayisubiragamo maze nawe akaba umwe mu batanga uyu murage w’urukundo ku banyarwanda.

Ni indirimbo ishimangira imbaraga z'urukundo kandi ikagaragaza amahirwe abarufite bagira ndetse ikibutsa ababyeyi bose ko mu mirage bagomba guha ibibondo byabo, hatagomba kubura urukundo kuko ruhatse byinshi ku buzima bwa muntu.

Chrisy Neat warahuye ubumenyi mu Ishuri ya Muzika rya Nyundo risigaye rikorera i Muhaga, yabwiye inyaRwanda ibijyanye n’imyuga ye irimo kuririmba no gutunganya amajwi y’indirimbo yaba ize bwite n'iz'abandi bahanzi. 

Yavuze ko gutunganya amajwi abikorera muri studio “Ibisumizi” ya Riderman, ndetse ko ari byo akora cyane kurusha kuririmba nubwo byose abikunda.

Kanoheli Chrismas Ruth uzwi ku izina rya Chrisy Neat, ni umubyeyi wubatse ufite n’abana babiri. Ni umuhanga utangaje mu gutunganya amajwi y’indirimbo, akarusho akaba ari nawe witunganiriza indirimbo ze.

Ubwo yagarukaga ku nganzo ya nyakwigendera Rugamba Cyprien, yavuze ko amufata nk’umuntu wari umuhanga, bitewe nuko yandikaga indirimbo zifite ubutumwa buremereye, kandi n'ubu bugifasha abantu benshi nawe arimo.

Yagize ati “Mufata nk’umuntu w’umuhanga kandi w'icyitegererezo cyane, yaba mu kwandika indirimbo ndetse n’uburyo yaziririmbaga.

Yavuze ko iyi ndirimbo yayikoze nk’impano yageneye abanyarwanda cyane cyane abakunzi be kuko abakunda.

Ati “Ndababwira ngo mugire urukundo, buri mwe akunde mugenzi we nk'uko biri muri iyi ndirimbo, ndetse twibuke ko ari umurage mwiza twasigiwe n’umubyeyi nyakwigendera Rugamba Sipiriyani”.

Uyu muririmbyi yaririmbye izindi ndirimbo zitandukanye zirimo “Ndakwihaye”, “Imaragahinda ya Kamariza”, “Ikibondo”, n’izindi.

Yadutangarije kandi ko yatunganyije mu buryo bw'amajwi indirimbo 5 ziri kuri Albumu nshya ya Alpha Rwirangira.

Mu ndirimbo yakoze zigakundwa harimo n’indirimbo ya Riderman yitwa “Nyegamo ya Nyagasani” ndetse bafatanije no kuyiririmba.

Chrisy Neat avuga ko afite ibikorwa byinshi ateganya gukora yaba ku ruhande rw’umuziki cyane cyane mu gutunganya amajwi y’ibihangano by’abamugana. Ashimira inkunga ya buri wese mu kuzamura ibikorwa bye no kumushyigikira.

Chrisy Neat yaraze urukundo abakunzi be bose n'abanyarwanda muri rusange

Chrisy Neat umuhanga mu gutunganya amajwi y'indirimbo yagize ati "mbaraze urukundo"

Umwuga wo gutunganya amajwi arawukunda kandi niwo akora cyane kurusha kuririmba

KANDA HANO UREBE AMASHUSHO Y'INDIRIMBO "URUKUNDO" YARIRIMBWE NA CHRISY NEAT, YANDITSWE NA RUGAMBA SIPIRIYANI

">