Elon Musk wa Twitter mu bakire 6 bashobora kwegukana Liverpool yashyizwe ku isoko

Liverpool yatangiye urugendo rushya rwo gushaka uwayigura nyuma y’uko sosiyete yitwa Fenway Sports Group (FSG) yari iyifite mu biganza iyishyize ku isoko. Iyi sosiyete yashyize itangazo hanze ejo hashize rivuga ko bashyize Liverpool ku isoko, bakaba baravuze ko mu minsi 12 gusa ariyo yo kumvamo ubusabe bw’abashaka kuyigura.

Dore abaherwe 7 bahabwa amahirwe kurusha abandi yo kwegukuna Liverpool

Sir Jim Ratcliffe

Umukire w'umwongereza ,Sir Jim Ractliffe n’ubundi ntabwo ari ubwa mbere avuzwe ku kuba yifuza kugura Liverpool. Uyu mukire abarirwa mu gutunga biliyoni 10 z'amapawundi. Sir Jim Ratcliffe n'ubundi asanzwe afite amakipe arimo Nice, Swiss Side FC Lausanne-Sport n'ikipe y’amagare yitwa Ineos Grenadiers. Uyu mugabo yagiye ashaka no kugura andi makipe arimo Chelsea na Manchester United.

Sheikh Khaled Bin Zayed Al Nehayan

Uyu mugabo ni mubyara w'umukire ufite Manchester City witwa Sheikh Mansour. Byaba bishimishije kubona Manchester City yahuye na Liverpool, uyu mugabo aramutse aguze Liverpool nayo yatangira kuba nka Man City mu gushora amafaranga menshi ku isoko. Sheikh Khaled Bin Zayed Al Nehayan yashatse kugura Liverpool mbere muri 2018 atanga biliyoni 2 z'amapawundi ariko biranga, ndetse yanashatse kugura Newcastle muri 2019 nayo birangira byanze.

Muhsin Bayrak

Umunya Turukiya, Muhsin Bayrak abarirwa biliyoni 8 z'amapawundi nk’uko sosiyete ye yitwa AB Group Holding, ikaba ikora mu bijyanye n'ubukerarugendo ndetse n'ubwubatsi. Uyu mugabo yavuzwe ku kuba ariwe uzagura Chelsea nyuma yo kubonana n’uwari nyirayo Roman Abramovich, ariko birangira byanze. Liverpool n'ubundi ntaho itaniye na Chelsea yashakaga kugura kuko nayo itwara ibikombe, ariyo mpamvu byahita byoroha no kumufasha kuzamura ubucuruzi bwe.

LeBron James

Umunyabigwi muri NBA LeBron James, ni ibisanzwe bizwi n'ubundi afana Liverpool. Uyu mukinnyi wa Los Angeles Lakers n'ubundi yari yaragiranye ibiganiro n'abakire ba Liverpool, ku kuba yagira umugabane wa 2% mu myaka 11 ishize. Lebron James yatangiye kuba umufatanyabikorwa wa FSG 2021. N’ubwo uyu mukinnyi ukomeye muri Basketball ahabwa amahirwe, ariko umutungo we ubarirwa muri biliyoni 1 y'amapawundi.

Elon Musk

Uyu mugabo w'imyaka 57 izina rye ryavuzwe cyane akimara kugura urubuga rwa Twitter. Elon Musk afite ubushake ndetse n'ubushozi bwo kugura Liverpool, kuko umutungo we wose ubarirwa muri biliyoni 175 z'amapawundi. Uyu mugabo si ubwa mbere avuzwe mu kugura amakipe, kuko yigeze no gushaka kugura Machester United.

Sir Martin Broughton

Sir Martin Broughton yananiwe kugura ikipe akunda ya Chelsea muri uyu mwaka. Uyu mugabo yateganyaga kubona amafaranga azamufasha kugura Chelsea avuye mu kigo cyo muri Leta Zunze Ubumwe za Amerika, cyitwa Creative Artists Agency, gusa birangira byanze.

Izina ry'uyu mugabo riramenyerewe muri Liverpool kuko n'ubundi yari ari mu bayobozi bayo muri 2010, ndetse ari no mu bafashe imyanzuro yo kugurisha Liverpool kuri iyi sosiyete yitwa Fenway Sports Group.