Kagere Meddie yatandukanye na Simba SC bucece

Ni inkuru yavuzwe kuva ku mwaka wa gatatu uyu musore ari muri Simba ko ashobora gutandukana n'iyi kipe, ariko bikarangira ayigumyemo. Muri uyu mwaka kandi nyuma yo gusoza amasezerano, Kagere Meddie yatangiye guhondanyisha imitwe abayobozi ba Simba SC, uruhande rumwe rushaka ko yakongera amasezerano urundi rukavuga ko akwiye gusezererwa.

Ubuyobozi bwa Simba SC bwatinye kugira umwanzuro bwafata ako kanya, ndetse uyu mukinnyi ajyana n'ikipe mu gihugu cya Misiri mu mwiherero utegura umwaka wa shampiyona.

Amakuru InyaRwanda yakuye mu gihugu cya Misiri ni uko uyu musore w'imyaka 35 y'amavuko, Simba SC yamaze kumusezerera ndetse atakiri kumwe n'ikipe mu mwihirero n'ahantu ari kuri ubu hatazwi neza. 

Kagere Meddie yageze mu ikipe ya Simba SC avuye muri Gor Mahia yo muri Kenya 

Kuri uyu wa mbere nibwo ikipe ya Simba SC yakinnye na Alkholood FC ikinamo umunyarwanda Hakizimana Muhadjiri, bayitsinda ibitego 2-0. Kagere Meddie ntiyagaragaye mu bakinnyi bari ku kibuga, bivugwa ko hari n'abandi bakinnyi bagera kuri 3 basezerewe mu cyumweru gishize.

Kagere Meddie yari amaze imyaka 4 muri Simba SC aho yayikiniye imikino igera kuri 76 atsindamo ibitego 52, akaba yarabaye umukinnyi watsinze ibitego byinshi muri shampiyona ya Tanzania imyaka ibiri yikurikiranya akihagera.

Kagere asanzwe ari umukinnyi w'inararibonye mu ikipe y'igihugu Amavubi

Kagere Meddie wari Kapiteni w'ikipe y'igihugu mu mikino ibiri iheruka, ashobora kugaruka gusazira mu Rwanda mu makipe arimo APR FC atarakinira na rimwe, Rayon Sports na Police FC yanyuzemo mbere. Kagere Meddie kandi hari amakuru ava muri Tanzania avuga ko ashobora kuguma muri iki gihugu, mu gihe amakipe nka KMC na Namungo hagira imwe imusinyisha.

Meddie Kagere yari umwe mu bakinnyi b'abanyarwanda wari usigaye muri Tanzania, nyuma ya Haruna wahoze muri Yanga African ubu akaba ari muri As Kigali, ndetse na Mugiraneza Jean-Baptiste Migi wahoze muri KMC ubu akaba ari muri Police FC.