Umuhanzikazi Butera Knowless witegura gushyira hanze indirimbo yise ‘Tobora’, yatangaje ko abahanzi Nyarwanda bashyigikiwe bagera kandi bakarenga ku rwego nk’urw’abahanzi baririmbye mu iserukiramuco ry’umuziki rizwi nka Afro Nation ryabereye muri Portugal.
Iri serukiramuco ryabaye mu gihe cy’iminsi
itatu, rihuriza hamwe ibihumbi by’abantu baturutse imihanda yose batahana
ibyishimo binyuze mu ndirimbo zacuranzwe zubakiye ku mudiho wa Afrobeats, Hip
Hop, RnB, Dancehall, Amapiano, Afro House n’izindi.
Ryaririmbyemo kandi ricurangamo
abahanzi bakomeye n'aba Dj kuva ku wa 1 Nyakanga kugeza ku wa 3 Nyakanga 2022
barimo Burna Boy, Chris Brown, Wizkid, Megan Thee Stallion, Beenie Mana, C4
Pedro, Ckay, Dadju, Diamond Platnumz, Innoss'B, Kizz Daniel, Koffee, Maitre
Gims, Midas The Jagaban na Naira Marley.
Hari kandi Nelson Freitas, Neru
Americano, Niniola, Pa Salieu, Patoranking, R2Bees, Reekado Banks, Rema, Ruger,
Shasimone, Small Doctor, Tekno, Tems, Wande Coal, Focalistic, Kabza de Small,
Major League Djz, Dj Maphorisa, DBN Gogo, De Mthuda, Juls, Kamo Mphela, Mr
Jazziq, Uncle Waffles, Vigro Deep na Young Stunna.
Ryabereye ku mucanga Praia da Rocha
beach muri Portimão no mu bindi bice. Ryitabiriwemo n’abarimo umuhanzikazi
Butera Knowles sari kumwe n’umugabo we Ishimwe Karake Clement.
Knowless yabwiye INYARWANDA ko hari
byinshi yungukiye muri iri serukiramuco risanzwe rihuriza hamwe abantu bafite
imico itandukanye bo mu bihugu bitandukanye byo ku Isi, atari abahanzi gusa
ahubwo n’abaryitabira.
Avuga ko akurikije urwego iri
serukiramuco rigezeho hakozwe ibishoboka rikajya rigera no mu Rwanda, byasiga
inyungu mu myidagaduro, mu bushabitsi no mu zindi nguni z’ubuzima. Aragira ati:
Baba baturutse mu bihugu byinshi cyane bitandukanye ari benshi cyane ku buryo nibaza y’uko ikintu nka kiriya kibaye mu Rwanda, turamutse tubonye uburyo bitegurwa cyangwa se wenda nk’uko bigenda bibera ahantu hatandukanye bikaba byabera mu Rwanda twahungikira ibintu byinshi cyane mu buryo bw’imyidagaduro no business muri rusange, byaba ahantu henshi mu nzego zitandukanye.
Uyu muhanzikazi wakunzwe mu ndirimbo
zirimo ‘Komeza’, avuga ko iri serukiramuco ryamusigiye ishusho y’uko abahanzi
bari ku rwego rwiza bafite impano zikomeye, ariko bakeneye gushyigikirwa kugira
ngo nabo babe baririmba mu iserukiramuco nk’iri.
Ati “Bafite impano zikomeye ku buryo
ntekereza y’uko bashyigikiwe cyangwa se uburyo abahanzi b’abanyarwanda
bashyigikirwa, kuko abantu bose baba bari hariye baba bashyigikiwe n’abantu b’iwabo
barabateje imbere kugira ngo bajye kugera kuri iriya ntera nibaza y’uko
nkukirikije uko nzi impano z’abanyarwanda b’abaririmbyi bari ku rwego
rushimishije ikibura ni aho kumera kugira ngo bagere ku rubyiniro nka ruriya.”
Knowless yavuze ko yishimiye
kwitabira iri serukiramuco n’ubwo risaba kuba umuntu yahagaragara mu gihe cy’amasaha
arenga 10, ariko bitewe n’umuziki ‘ntabwo uba wananiwe’. Ati “Byari byiza, yari
‘experience’ nziza. Byari birikwiye ko unmuntu ajyayo, twaranezerewe.”
Uyu muhanzikazi ari kwitegura
gusohora indirimbo yise ‘Tobora’. Avuga ko ashobora kuyishyira hanze mu mpera z’iki
cyumweru cyangwa se mu ntangiriro z’iki cyumweru kiri imbere. Ni indirimbo
avuga ko yihariye bitewe n’ubutumwa buyikubiyemo.
Umunyamuziki Burna Boy
yashimishije abitabiriye iri serukiramuco
Diamond waserukiye
Akarere k’Afurika y’Iburasirazuba yagaragaje ko ari umuhanzi wihagazeho
Knowless yavuze ko we n’umugabo we
bishimiye kwitabira iserukiramuco Afro Nation 2022 ryaberaga mu gihugu cya
Portugal
Iri serukiramuco Knowless yitabiriye
ryaririmbyemo Burna Boy, umuraperikazi Megan The Stallion n’abandi bakomeye
Knowless avuga ko abahanzi nyarwanda
bashyigikiwe bagera ku rwego rwiza rwiza nk’urw’abaririmbye muri Portugal
Wizkid muri Afro Nation yabereye muri
Portugal
TANGA IGITECYEREZO