Biravugwa: APR FC yongereye amasezerano umutoza Adil Mohammed

Kuri uyu wa Kabiri tariki ya 5 Nyakanga 2022 nibwo ku mbuga nkoranyambaga hasakaye amakuru yemeza ko umutoza Adil yongereye amasezerano y’imyaka ibiri muri APR FC.

Amakuru INYARWANDA yahawe n’umwe mu bari hafi y’iyi kipe yemeje ko Adil Mohammed azakomeza gutoza APR FC indi myaka ibiri iri imbere ndetse ko ikipe izagaragaramo impinduka mu mwaka utaha w’imikino.

Uyu mutoza wari usoje amasezerano y’imyaka 3 muri APR FC, yavugwaga mu makipe atandukanye yo hanze y’u Rwanda yiganjemo ayo mu Barabu no muri Aziya.

Adil Mohammed yageze muri APR FC mu 2019, mu myaka itatu amaze ayitoza yayifashije kwegukana ibikombe 3 bya shampiyona gusa atakaza igikombe cy’Amahoro.

Adil Kandi yafashije APR FC kwandika amateka yo kumara imikino 50 idatsinzwe muri shampiyona y'u Rwanda no kwegukana ibikombe bibiri bya shampiyona idatsinzwe umukino n'umwe, aka kakaba ari agahigo yihariye.

Uyu mutoza wamaze igihe kirekire adafite ibyangombwa bimwemerera gutoza imikino nyafurika, yatangaje ko yamaze kubibona ndetse kuri ubu nta kibazo afite.

APR FC iritegura umwaka utaha w’imikino wa 2022-23 ndetse ikazahagararira u Rwanda mu mikino ya CAF Champions League yifuza gukora ibitandukanye n’imyaka itambutse ikagera kure.