RFL
Kigali

Tottenham yabonye umutoza mushya nyuma y’amasaha 24 yirukanye undi

Yanditswe na: SAFARI Garcon
Taliki:2/11/2021 15:01
0


Umutaliyani watoje Chelsea, Antonio Conte, yagizwe umutoza mushya w’ikipe ya Tottenham Hotspurs, akaba agiye gusimbura umunya-Portugal Nuno Espirito Santo wirukanwe mu masaha 24 ashize kubera umusaruro mubi.



Kuri uyu wa kabiri tariki ya 02 Ugushyingo 2021, nibwo Antonio Conte yasinye amasezerano y’umwaka n’igice (Amezi 18) muri Tottenham, ashobora kongerwaho umwaka umwe.

Tottenham ibinyujije ku rukuta rwayo rwa Twitter yahaye ikaze Antonio Conte mu muryango mugari wayo nyuma yo gusinya amasezerano y’umwaka n’igice agiye gutoza iyi kipe imaze igihe idatsinda muri Premier League.

Conte asubiye mu mujyi wa Londres yaherukagamo mu myaka itatu ishize ubwo yatozaga Chelsea, ubu akaba agiye kujya ahangana nayo atoza Tottenham.

Bimwe mubyo ubuyobozi bwa Tottenham buyobowe na Daniel Levy bwasabye umutoza Conte, harimo gufasha ikipe gusoza mu myanya myiza muri shampiyona y’uyu mwaka ikipe ikazitabira Champions League ndetse akubaka ikipe ikomeye.

Magingo aya, Tottenham iri ku mwanya wa cyenda n’amanota 15 mu mikino 10 imaze gukinwa muri Premier League uyu mwaka.

Conte azatangira akazi muri Tottenham yakira ikipe ya Vitesse muri Europa Conference League ku wa Kane w’iki cyumweru, mu gihe ku Cyumweru azajya gusura Everton muri Premier League.

Conte nta kazi yari afite nyuma yo gusezera muri Inter Milan uyu mwaka. Akaba yaratoje amakipe akomeye i Burayi arimo Chelsea, Juventus n’ikipe y’igihugu y’u Butaliyani.

Uyu mutoza kandi yavugwaga mu makipe atandukanye yo mu Bwongereza arimo Newcastle United na Manchester United.

Atoza Chelsea, Conte yayifashije kwegukana igikombe cya shampiyona cya 2016-17 ndetse anayifasha kwegukana FA Cup 2017-18.

Antonio Conte yagizwe umutoza mushya wa Tottenham Hotsuprs

Conte yafashije Chelsea kwegukana igikombe cya shampiyona





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND