Ishimwe Joshua [Josh Ishimwe] uhimbaza Imana mu njyana Gakondo yashyize hanze indirimbo nshya yise "Yezu wanjye" yasohokanye n'amashusho yayo aryoheye ijisho. Amajwi y'iyi ndirimbo yakozwe na Producer Boris, amashusho afatwa na Producer Musinga. Imena Clothing ni we wambitse Josh Ishimwe muri iyi ndirimbo.
Mu kiganiro na InyaRwanda.com, Josh Ishimwe yavuze impamvu yakoze iyi ndirimbo ndetse n'icyo asaba umuntu wese uyumva n'uzayireba. Yabifurije ko yababera isengesho rya buri munsi. Yagize ati "Nifuje kubasangiza iyi ndirimbo "Yezu wanjye" nsaba Imana ngo ibe isengesho ryacu rya buri munsi kandi ngirango nongere nkomeze abantu baba babaye cyangwa bari mu kaga ngo bizere Yezu nawe abahaze amahoro yee. Murakagira Imana".
Josh Ishimwe yifuza ko indirimbo ye nshya 'Yezu wanjye' yaba isengesho rya buri umwe
Muri iyi ndirimbo ye nshya 'Yezu wanjye', Josh Ishimwe aterura agira ati "Yezu Wanjye, nzahora nkuririmbira mpanike amajwi, ncinye n'akadiho, nsimbuke nce umugara, abagabo bivuge, ababyeyi bavuze impundu. Ni wowe buzima bwanjye, ni wowe mahoro yanjye. Ndagusaba ubwenge ndetse n'ubushishozi mu byo nkora byose, ni wowe niragije, tabara abababaye n'abari mu kaga bagusange bose, ubahaze amahoro yawe. Yezu Mwami mwiza, Mwami w'amahoro, reba intama zawe zije zigusanga."
"Ngutuye ababyiruka, ubarinde ibibaziga, mu butoya bwabo, bahore bakunogeye. Uri umushumba mwiza, Mwungeri umenya intama, ngume nkugane wowe Mwami wanjye, ganza Mwami wanjye, singizwa vugwa ibigwi, ababyeyi bavuze impundu, niwowe buzima bwanjye, niwowe mahoro yanjye. Ngutuye abababaye bakeka ko utabareba bibutse ko utabahana intege ziyongere. Ngutuye ababyeyi kuko nawe wabyawe ubongera imbaraga bahore bakurerera".
Josh Ishimwe ahagaze neza mu bahanzi bakora injyana Gakondo
Josh Ishimwe ni umuhanzi w'umuhanga umaze igihe gito mu muziki nyarwanda, gusa impano ye yasamiwe hejuru n'abakunzi bawo by'umwihariko abakunda injyana Gakondo uyu musore yihebeye. Mu rugendo amazemo umwaka umwe mu muziki uhimbaza Imana mu njyana Gakondo, Josh Ishimwe akomeje kwishimirwa cyane mu ndirimbo eshatu amaze gukora ari zo: 'Yesu Ndagukunda', 'Amasezerano' na 'Yezu wanjye' yashyize hanze mu masaha macye ashize.
Josh Ishimwe yashyize hanze indirimbo 'Yezu wanjye'
REBA HANO INDIRIMBO NSHYA 'YEZU WANJYE' YA JOSH ISHIMWE
Eng
RSS 
TANGA IGITECYEREZO