Ahabanza Imikino

UCL: Bwa Mbere mu mateka PSG yatsinze Manchester City mu mukino Messi yigaragajemo – AMAFOTO

Yanditswe na: SAFARI Garcon
Taliki:29/09/2021 8:58 0

Kapiteni w’ikipe y’igihugu ya Argentine, Lionel Messi, yafashije ikipe ya Paris Saint Germain kwandika amateka yo gutsinda Manchester City bwa mbere mu mateka, anayitsinda igitego cya mbere muri iyi kipe yijeje igikombe cya Champions League.

Mu ijoro ryo kuri uyu wa Kabiri tariki ya 28 Nzeri 2021, ku kibuga Parcs des Prince, Paris Saint Germain yari yakiriye Manchester City mu mukino wo mu itsinda A muri UEFA Champions League, warangiye ku ntsinzi y’ibitego 2-0 bya PSG, mu mukino Messi yatsinzemo igitego ariko anafasha iyi kipe kwegukana amanota atatu.

Lionel Messi yatsinze igitego cye cya mbere akinira Paris Saint-Germain mu mukino w’umunsi wa kabiri wo mu itsinda A muri Champions League, ikipe ye yatsinzemo Manchester City ibitego 2-0.

PSG yihimuye kuri Manchester City kuko amakipe yombi yaherukaga guhurira muri ½ cy’irushanwa nk’iri mu mwaka ushize, Paris Saint-Germain isezererwa itsinzwe igiteranyo cy’ibitego 4-1.

Umukino watangiye amakipe yombi akinira mu kibuga hagati ahererekanya neza agerageza kurema uburyo bw’igitego, ariko Manchester City igakina neza yiharira umupira kurusha PSG.

Gusa byose byahinduye isura ku munota wa munani ubwo Paris Saint-Germain yafunguraga amazamu ku gitego cyatsinzwe na Idrissa Gana Gueye ku mupira wahinduwe mu rubuga rw’amahina na Kylian Mbappé, ubanza gukorwaho na Neymar mbere y’uko ugera kuri uyu Munya-Sénégal wateye ishoti rikomeye mu nguni yo hejuru mu izamu, umunyezamu wa Manchester ntiyarabukwa.

Nk’ibisanzwe mu mikinire ya Manchester City, n’ubundi yakomeje kwiharira umupira ishaka igitego cyo kwishyura, binyuze ku bakinnyi bayo barimo Riyad Mahrez na Jack Grealish, ariko Guianluigi Donnarumma wari mu izamu rya PSG ababera ibamba.

Iyi kipe yo mu Bufaransa yarokotse ku munota wa 26, ubwo Raheem Sterling yateraga umupira n’umutwe ugasubizwa inyuma n’umutambiko w’izamu mu gihe umunyezamu Donnarumma yari atarahaguruka, wahise ugera kuri Bernardo Silva na we wawuteye mu izamu n’ikirenge ukubita umutambiko w’izamu usubira inyuma, abakinnyi ba PSG baratabara bawukuramo.

Ubwo bwari uburyo bukomeye kuri Manchester City yashakaga kwishyura igitego ariko amahirwe ntiyabasekeye. Iminota 45 y’igice cya mbere irangira PSG iyoboye n’igitego 1-0.

Mu gice cya kabiri Manchester City yongeye kwiharira umupira ndetse yashoboraga kwishyura ku munota wa 56, ku ishoti ryatewe na Kevin De Bryune ariko risubizwa inyuma na Gianluigi Donnarumma wasohotse neza.

Abakinnyi ba PSG barimo Neymar na Messi bakomeje kurema uburyo bw’igitego, ariko ntibyabagendekera uko babiteguye.

Ku munota wa 74 Messi yazamukanye neza umupira ahereza Mbappé wawukozeho gato arawumusubiza, ubundi atera ishoti rikomeye ari ku murongo w’urubuga rw’amahina, umupira uruhukira mu rushundura atsinda igitego cye cya mbere mu mwambaro wa Paris Saint-Germain.

Igitego Messi yatsinze cyabaye icya 121 muri iri rushanwa, arushwa 14 na Cristiano Ronaldo uyoboye abandi mu gutsinda ibitego byinshi i Burayi.

Gutsinda uyu mukino byatumye PSG iyobora Itsinda A n’amanota ane inganya na Club Brugge, yo yatsindiye RB Leipzig iwayo ibitego 2-1. Manchester City ifite amanota atatu ku mwanya wa gatatu. Nibwo bwa mbere mu mateka PSG itsinze Manchester City kuko mu mikino Itanu amakipe yari yarakinnye mbere, Manchester City yatsinze itatu, banganya imikino ibiri.

Uko amakipe yatsindanye kuri uyu wa Kabiri:

Itsinda A:

Paris Saint-Germain 2-0 Manchester City

RB Leipzig 1-2 Club Brugge

Itsinda B:

Milan AC 1-2 Atlético Madrid

FC Porto 1-5 Liverpool

Itsinda C:

Ajax 2-0 Besiktas

Borussia Dortmund 1-0 Sporting CP

Itsinda D:

Shakhtar Donetsk 0-0 Inter Milan