Kenya:Isaac One Man usanzwe ukora Reggae yashyize hanze indirimbo "Bihorere " iri mu mudiho wa Karahanyuze

Isaac One Man amenyerewe mu njyana ya Raggae akorera mu gihugu cy'abaturanyi cya Kenya. Indirimbo ze ziba ziganje mu kubiba urukundo n'amahoro mu Banyarwanda n'abandi bose babasha kuzumva.

Aganira na InyaRwanda, uyu muhanzi yavuze ko anezezwa no gukora indirimbo ikubiyemo ubutumwa bwigisha rubanda, akavuga ko n’ubwo akora injyana ya Raggae, n'izindi azisangamo cyane, mu kuba yakoze indirimbo imeze nka karahanyuze bidatunguranye cyane.  Muri 'Bihorere' ashimangira ko ivuga ku rukundo rw'umusore ushobora kumva amabwire kandi ari mu rukundo.

Isaac One Man yagize ati: " ‘Bihorere’ ikoze mu njyana iteye nk’iya karahanyuze. Ivuga ku musore ukunda umukobwa ariko rimwe na rimwe abantu bakabavuga cyane, gusa umusore akamubwira ko n’ubwo babavuga gute ko abihorera kandi ko abima amatwi kuko mu buzima hari igihe abantu bakundana ariko bagatandukanywa n'amagambo ariko urukundo nya rukundo ntirwumva amabwire".