Akarere ka Rubavu kashyizwe muri 'Guma mu Karere'

Ni icyemezo cyafashwe na Minisiteri y'Ubutegetsi bw'Igihugu, kuri uyu wa 16 Kamena 2021, hashingiwe ku byemezo by'Inama y'Abaminisitiri yateranye ku wa 12 Kamena 2021, hanashingiwe 'ku isesengura ryakozwe n'inzego z'ubuzima ku cyemezo cya Koronavirusi (Covid-19) mu gihugu'.

Mu itangazo ryashyizweho Umukono na Minisitiri w'Ubutegetsi bw'Igihugu, Gatabazi Jean Marie Vianney rivuga ko "Guhera ku wa kane tariki 17 Kamena, aka karere ka Rubavu gashyizwe muri 'Guma mu Karere' kugira ngo inzego zibishinzwe zifatanyije n'abaturage zishobore gukurikirana neza no kugenzura iki cyorezo cya Covid-19 gikomeje gufata indi ntera”.

Itangazo rikomeza rivuga ko "Muri aka Karere ka Rubavu kandi guhera ku wa kane tariki 17 Kamena 2021, ingendo zirabujijwe guhera saa moya z'ijoro (7:00PM) kugeza sa kumi za mu gitondo (4:00AM)."

Rikavuga ko "Abakora ubwikorezi bw'ibicuruzwa hakoreshejwe ibinyabiziga bemerewe kubizana mu Karere ka 'Rubavu', kandi abafite ibicuruzwa byambukiranye umupaka nabo bemerewe kubyambutsa hakurikijwe amabwiriza abigenga'.

Mu Karere ka Rutsiro guhera ku wa Kane tariki ya 17 Kamena 2021, ingendo zirabujijwe guhera saa moya z'ijoro (7:00PM) kugeza saa kumi za mugitondo (4:00AM).

Uturere twa Burera, Gicumbi na Nyagatare; guhera ku wa kane tariki 17 Kamena 2021, ingendo zirabujijwe guhera saa moya z'ijoro kugeza saa kumi za mu gitondo (4:00AM) mu Mirenge ya Cyanika, Kagogo, Kinyababa, Butaro, Kivuye na Bungwe y'Akarere ka Burera, Rubaya, Cyumba na Kaniga y'Akarere ka Gicumbi na Matimba, Musheri, Rwempasha, Tabagwe, Karama na Kiyombe y'Akarere ka Nyagatare. 

Iri tangazo risoza rivuga ko 'Abanyarwanda bose barasabwa gukomeza kubahiriza amabwiriza yo kwirinda Koronavirus yatanzwe n'inzego z'ubizima'.

Imibare ya Minisiteri y’Ubuzima yo kuri uyu wa Kabiri tariki 15 Kamena 2021, yerekanye ko abantu 298 ari bo banduye Covid-19 mu Rwanda mu gihe nta muntu mushya wakize iki cyorezo.

Abantu 14 ni bo barembye mu barwayi 2,157 bakirimo kwitabwaho n’abaganga. Ni mu gihe abamaze gupfa ari 372. Ejo nta muntu witabye Imana azize Covid-19.