Barcelona niyo kipe ya mbere ku Isi: Imbamutima za Sergio Kun Aguero wageze mu ikipe y’inzozi ze

Kuri uyu wa Mbere tariki ya 31 Gicurasi 2021, nibwo FC Barcelona yahaye ikaze rutahizamu Aguero nyuma yo gukora ikizamini cy’ubuzima.

Uyu Munya-Argentina w'imyaka 32, avuye muri City yari amazemo imyaka 10, aho yabaye umukinnyi wa mbere umaze kuyitsindira ibitego byinshi kurusha abandi bose, aho yatsinze ibitego 260 yatsinze mu mikino 390.

Umukino we wa nyuma muri Man.City, yawukinnye ku wa gatandatu ushize ubwo yinjiraga mu kibuga asimbuye mu mukino wa nyuma wa Champions League ikipe ye yatsinzwemo na Chelsea 1-0, ikayitwara igikombe.

Nyuma yo guhabwa ikaze i Camp Nou, Aguero yagize ati "Twese turabizi ko Barcelona ari yo kipe ya mbere ikomeye ku Isi".

"Ntekereza ko nafashe icyemezo cyiza cyo kuba hano kandi birumvikana ni intambwe nteye mu mwuga wanjye".

"Rwose ndishimye kandi nizeye ko nshobora gufasha ikipe kugira ibikombe itsindira".

Kugira ngo Aguero azasohoke muri Barcelona, ikipe izamwifuza bizayisaba kwishyura Barcelona miliyoni 100 z'ama-euro (arenga miliyari 120 y'u Rwanda) ku ruhande, atari ku giciro.

Aguero watsindiye ibikombe 15 bikomeye mu gihe amaze ari kumwe na Manchester City, azasanga muri Barcelona mugenzi we bakomoka mu gihugu kimwe akaba n'inshuti ye magara, Lionel Messi, mu gihe iyi kipe ishaka kugira icyo ihindura ku mwanya wa gatatu yasoje iriho muri shampiyona ya La Liga y’uyu mwaka.

Aguero avuye muri Premier League ari ku mwanya wa kane mu bakinnyi bamaze gutsinda ibitego byinshi cyane mu mateka yayo, ibitego 184.

Ni na we mukinnyi w'umunyamahanga ukina muri Premier League watsinze ibitego byinshi, ndetse mu kwezi kwa mbere mu 2020 yakuyeho umuhigo wari ufitwe na Alan Shearer nk'uwatsinze ibitego bitatu mu mukino umwe inshuro nyinshi, yabitsinze inshuro 12.

Kun Aguero yasinyiye FC Barcelona amasezerano y'imyaka ibiri

Aguero yatangaje ko yishimiye kuba agiye gukina mu ikipe ya mbere ku Isi