Rayon Sports yaguye miswi na Kiyovu ikomeza kuyobora itsinda B ririmo imibare myinshi

Umukino ubanza wabereye kuri Stade Amahoro, Kiyovu Sports yegukanye amanota atatu itsinze Rayon Sports ibitego 3-2.

Rayon Sports XI: Kwizera Olivier, Ndizeye Samuel, Habimana Hussein, Niyigena Clement, Mujyanama Fidele, Nshimiyimana Amran, Luvumbu Hertier, Nishimwe Blaise, Drissa Dagnogo, Niyonkuru Sadjat na Manace Mutatu

Kiyovu Sports XI: Kimenyi Yves, Ngandu Omar, Mbogo Ally, Gilbert, Serumogo Ally, Bonane, Abed Bigirimana, Vincent Habamahoro, Armel Ghislain, Saba Robert na Saleh Nyirinkindi

Uyu mukino ukaba utangiye utinzeho iminota irindwi, ukaba utangijwe na Kiyovu Sport.

1' Abakinnyi ba Kiyovu Sports bateye umupira imbere uruhukira mu maguru y'umunyezamu Olivier Kwizera

3' Rayon Sports itangiranye imbaraga isatira izamu rya Kiyovu, ibonye Coup Franc iri mu kibuga hagati itewe na Hussein

5' Kiyovu iri guhererekanya neza mu kibuga hagati binyuze ku bakinnyi barimo Gilbert, Armel na Abed Bigirimana

7' Idrissa Dagnogo ahushije uburyo bw'igitego ari mu rubuga rw'amahina ku mupira ateye aryamye hasi ariko ubwugarizi bwa Kiyovu bwirwanaho buwukuramo

8' Mujyanama Fidele ahawe ikarita y'umuhondo ku ikosa akoreye Saba Robert

12' Umupira uri gukinirwa mu kibuga hagati ariko Rayon Sports ikaba ariyo iri kuwiharira muri aka kanya

15' Coup Franc ya Kiyovu Sport iri ku ruhande rw'iburyo ku ruhande rwa Kiyovu, ikaba ibumoso ku ruhande rwa Rayon ku ikosa rikozwe na Mujyanama.

17' Rayon Sports ibonye koruneri nyuma y'igitutu abarimo Manace na Luvumbu bari bokeje izamu rya Kiyovu Sport

18' Coup Franc itewe na Luvumbu ariko Kimenyi arasimbuka afata umupira neza

20' Umukino utangiye gushyuha, amakipe ari gusatirana cyane, Rayon Sports ibonye coup Franc

22' Umupira wari utewe na Luvumbu Kimenyi Yves arawufata

27' Saba Robert ahawe ikarita y'umuhondo ku ikosa akoreye Hussein Habimana

28' Kiyovu Sport ikinnye neza cyane mu kibuga hagati, ku mupira uzamukanwe neza na Habamahoro, acomekera Nyirinkindi ariko abakinnyi ba Rayon Sports bawushyira muri Koruneri

29' Goaaaaaal Kiyovu Sport ifunguye amazamu ku gitego gitsinzwe na Mbogo Ally ku mupira uvuye muri koruneri itewe na Nyirinkindi Saleh, Mbogo arasimbuka ashyira ku mutwe atsindira Kiyovu igitego cya mbere.

33' Kiyovu Sport iri gusatira ishaka igitego cya kabiri, Nyirikindi yinjiranye umupira mu rubuga rw'umunyezamu Olivier Kwizera ariko ubwugarizi bwa Rayon bwirwanaho

35' Rayon Sports ibonye Coup Franc ku ikosa rikorewe Manace Mutatu

36' Hertier Luvumbu ateye ishoti rikomeye mu izamu rya Kiyovu Sport ariko uruhukira mu ntoki za Kimenyi

37' Kiyovu Sport ikomeje kotsa igitutu izamu rya Rayon Sports, n'ubu Armel Ghislain yongeye guhusha uburyo bw'igitego ku ishoti rikomeye ateye ariko umupira uca ku ruhande gato rw'izamu

42' Rugwiro Herve uri ku ntebe y'abasimbura ahawe ikarita y'umuhondo nyuma yo kutumvikana n'umusifuzi Nsoro, ku ikosa asifuye rikozwe na Hussein Habimana, anatanga Coup Franc ivuyemo koruneri.

44' Kiyovu Sports ikomeje kurusha Rayon Sports gukina neza mu kibuga hagati

45' Rayon Sports iri kugerageza uko yajya kuruhuka yishyuye igitego, ariko umusifuzi Nsoro arangije igice cya mbere.

Igice cya mbere kirangiye Kiyovu Sport iri imbere ya Rayon Sports n'igitego 1-0, magingo aya ubu Kiyovu niyo iyoboye itsinda B n'amanota 9

Igice cya kabiri cy'umukino kiratangiye.

46' Hertier Luvumbu ahereje umupira Habimana Hussein ahita akinana na Clement

Rayon Sports itangiranye imbaraga nyinshi irashaka kwishyura igitego hakiri kare, ibonye koruneri ariko ntacyo itanze

50' Koruneri ya Kiyovu Sport ku mupira wari uzamukanwe na Serumogo Ally wihutaga cyane

Nyirinkindi Saleh asohotse mu kibuga asimburwa na Nsengiyumva Moustapha

54' Coup Franc ya Rayon Sport ku ikosa Gilbert akoreye Ndizeye Samuel, umupira uteretse ku ruhande rw'iburyo ugana ku izamu rya Kiyovu

55' Impinduka eshatu ku ruhande rwa Rayon Sports, Dagnogo asimbuwe na Sugira Ernest, Sadjata asimburwa na Sekamana Maxime, mu gihe Mudacumura Jackson asimbuye Nshimiyimana Amran.

61' Kiyovu Sport ikoze impinduka, Saba Robert asohotse mu kibuga, hinjiye Ishimwe Kevin

64' Ikarita y'umuhondo ihawe Bonane ku ikosa akoreye Mujyanama Fidele

67' Penaliti ya Rayon Sports nyuma yuko Mbogo Ally afashe umupira n'ukuboko mu rubuga rw'amahina ku gitutu yari yokejwe na Sugira Ernest.

68' Goaaaaaal Rayon Sports yishyuye igitego gitsinzwe na Sugira Ernest kuri Penaliti

69' Kimenyi ahawe ikarita y'umuhondo nyuma y'amagambo abwiye umusifuzi

72' Rayon Sports ibaye nk'ikangutse, Sugira, Mudacumura, Sekamana na Luvumbu bari gukina neza, barashaka igitego cya kabiri

80' Kiyovu Sports irashaka igitego cya kabiri, abakinnyi barimo Moustapha na Serumogo bari gushakisha aho bamenera

86' Ikarita y'umuhondo kuri Serumogo Ally ufite amahane menshi mu kibuga

90' Sugira Ernest wenyine imbere y'izamu ahushije igitego cyari kuba icya kabiri ku mupira mwiza ahawe na Luvumbu ariko atera agashoti gato Kimenyi agafata bitamugoye

90'+5' Umusifuzi Nsoro yongeyeho iminota itanu

Rayon Sports ihushije uburyo bwari kuvamo igitego cya kabiri, kuri koruneri itewe na Luvumbu, Sugira arasimbuka ashyiraho umutwe umupira ugarurwa n'igiti cy'izamu.

Rayon Sports ibonye koruneri itewe na Manace umupira ugarukira Luvumbu ateye ishoti umupira uca hejuru y'izamu.

Umukino ukaba urangiye amakipe yombi aguye miswi igitego 1-1 mu minota 90.

Kunganya bitumye Rayon Sports ikomeza kuyobora itsinda B, aho ifite amanota 8, ikaba ikurikiwe na Kiyovu Sports igize amanota 7, Rutsiro itarakina umukino wa Gasogi United ifite amanota 5, mu gihe Gasogi United iri ku mwanya wa kane n'amanota 4.

Kugira ngo hamenyekane amakipe abiri azerekeza muri 1/4 bizasaba gutegeraza umukino w'umunsi wa nyuma mu itsinda.

Rayon Sports yaguye miswi na Kiyovu mu mukino ubanziriza uwa nyuma mu itsinda B