Nyuma yo gutandukana n'ikipe ya FC Pyunik bikavugwa ko ashobora kwerekeza mu Budage cyangwa mu Bubiligi, myugariro w'ikipe y'igihugu Amavubi, Nirisarike Salomon yerekeje mu ikipe ya Urartu FC, aho yasinye amasezerano y'umwaka n'igice.
Mu minsi ishize byaravuzwe ko uyu myugariro ashobora kwerekeza muri Fortuna Düsseldorf yo mucyiciro cya kabiri mu Budage cyangwa imwe mu makipe yo mu Bubiligi yamwifuzaga ariko byarangiye asubiye muri Armenia, muri Urartu FC ifite igikombe cya shampiyona muri iki gihugu.
Salomon yasinye amasezerano y'umwaka umwe n'igice muri iyi kipe imaze imyaka 29 ishinzwe.
Nirisarike abaye umwirabura wa gatanu ugiye gukina muri iyi kipe, akaba ahasanze abandi bane barimo umunye-Congo Peter Mutumosi, abanya-Nigeria babiri, Iwu Uguchukwu na Isah Aliyu ndetse n'umunya-Ghana Annan Menshah.
Urartu FC yashinzwe mu 1992, ikaba ikinira ku kibuga cya Urartu stadium Yerevan gifite ubushobozi bwo kwakira abantu 4860, ubu ikaba itozwa n'umwenegihugu ariko unafite ubwenegihugu bw'u Burusiya Aleksandr Grigoryan.
Mu mwaka w'imikino ushize, Urartu FC yasoje shampiyona iri ku mwanya wa karindwi.
Magingo aya, shampiyona yo muri Armenia igeze ku munsi wa 11, mu mikino 9 iyi kipe imaze gukina iri ku mwanya wa 6 n'amanota 15, ikaba irushwa na Ararat ya mbere amanota 3, gusa yo ikaba imaze gukina imikino 10.
Urartu FC ifite igikombe kimwe cya shampiyona ya Armenia yegukanye mu mwaka w'imikino wa 2013-2014, ikaba kandi ifite ibikombe 3 by'igihugu yegukanye mu 1992, 2007, na 2016, ndetse n'igikombe kimwe cya Armenian Supercup yegukanye mu 2014.
Salomon watandukanye na FC Pynik yerekeje muri Urartu FC
Urartu Stadium yakira abantu 4860 niyo Nirisarike agiye kujya akiniraho
Eng
RSS 
TANGA IGITECYEREZO