CHAN 2020: Amavubi n'Imisambi ya Uganda bagiye gusubukura ihangana

Ni umukino uza kuba ibibuga bimaze kumenyera amakipe amwe amaze gushira ubwoba ariko ku ruhande rw'Amavubi na Uganda baraba bafite isoni z'ubushyitsi ndetse bahabwa ikaze ku mukino wabo wa mbere.

Kuva iyi mikino yatangira tariki 16 Mutarama 2021 hamaze gukinwa imikino 4 hari kurangwa no kurumba kw'ibitego, kuko muri iyi mikino 4, hamaze kubonekamo ibitego 3 gusa.

Umutoza w'ikipe y'igihugu ya Uganda Johnathan McKinstry, araza guhura n'ikipe yatoje mu 2016 ubwo yari yungirijwe na Mashami Vincent uza kuba ari we mutoza mukuru w'Amavubi.

McKinstry ushaka gutsinda umikino w'abakeba bo mu burasirazuba bwa Afrika, yatangarije ibinyamakuru byo muri Uganda ko ashaka kugeza Uganda mu mikino ya 1/4 bwa mbere kuva bakwitabira ino mikino mu 2011.

Jonathan McKinstry agitoza u Rwanda

Amavubi ndetse n'Imisambi ya Uganda mu mikino 10 iheruka kubahuza, Uganda yatsinze imikino 6 banganya 2, Amavubi atsinda 2, ndetse Uganda ikaba itarinjijwe igitego mu mikino itandatu.

U Rwanda, iyi ni inshuro ya 4 rwitabira imikino ya CHAN ndetse rukagira n'ibihe byiza kuko rwigeze kuviramo mu mikino ya 1/4 basezerewe na DR Cango  mu mikino u Rwanda rwari rwakiriye.

Ayamakipe yombi yifashishije imikino ya gicuti mu kwitegura iri rushanwa, Amavubi acyura inota rimwe mu mikino ibiri bahuyemo na Congo Brazzaville. Uganda iba iya mbere mu irushanwa rwa gicuti ryari ryabereye muri Cameroun ifite amanota 7, imbere ya Cameroun, Niger na Zambia. 

Sugira Ernest ntabwo ari bukine kubera amakarita 2 y'umuhondo

Mu mikino itandatu iheruka aya makipe yombi yakinnye, Amavubi yanganyije 5 atsindwa umukino 1, Uganda itsinda imikino 4 inganya 1 itsindwa umukino 1.

Amakuru avuga mu makipe, Amavubi ntabwo ari bukinishe rutahizamo wayo ufite ibitego byinshi mu myaka 5 iheruka Sugira Ernest kubera ikibazo cy'amakarita 2 y'umuhondo. Sugira ni we wahesheje itike Amavubi ubwo yatsindaga igiteko mu minota ya nyuma cyatumye banganya na Ethiopia igitego 1-1, umukino wari wabereye i Kigali. 

Tonny Mawejje yagaruwe mu ikipe ya Uganda nyuma y'imyaka 3

Tonny Mawejje yongeye guhamagarwa ku ruhande rwa Uganda nyuma y'imyaka 3 atabona ubutumire, McKinstry yatangaje ko impamvu amuhamagaye ari ukugira ngo yongere uburambe mu bakinnyi bato.

Umukino urabera kuri stade de la Réunification, ikaba sitade yakira imikino itandukanye ariko by'umwihariko ikakira imikino y'umupira w'amaguru kuko ikipe ya Union Douala ariho yakirira. Abantu bagera ku bihumbi 30 nibo bajya muri iyi sitade yubatswe mu 1972. Uyu mukino uraza gutambuka kuri Canal na RTV.