Kigali

N'uburakari bwinshi Abafana ba Arsenal basabye umutoza Mikel Arteta gusezera

Yanditswe na: SAFARI Garcon
Taliki:30/11/2020 12:51
0

Nyuma y'umukino w'umunsi wa 10 muri Premier League, ikipe ya Arsenal yari imaze gutsindirwa mu rugo na Wolves ibitego 2-1, binyuze ku mbuga nkoranyambaga, abafana ba Arsenal basabye umutoza Mikel Arteta kurekura iyi kipe kuko akomeje kuyishyira habi cyane, dore ko ubu yicaye ku mwanya wa 14 ku rutonde rusange.



Ntabwo Arsenal yatangiye umwaka w'imikino wa 2020/21 neza, kuko ubu ihagaze aho umwanzi ashaka. Mu mikino 10 imaze gukinwa muri shampiyona y'u Bwongereza 'Premier League' iyi kipe yatsinze imikino 4, inganya umwe, itsindwa imikino 5, yatsinze ibitego 10, yinjizwa 12, bivuze ko irimo umwenda w'ibitego bibiri, ikaba yicaye ku mwanya wa 14 n'amanota 13, ikaba irushwa amanota 8 na Tottenham iri ku mwanya wa mbere.

Kwirengagiza Ozil mu bakinnyi ba Arsenal bazakina uyu mwaka w'imikino, ni kimwe mu bintu byababaje abafana n'abakunzi ba Arsenal bemeza ko iyi kipe yirengagije akamaro uyu mukinnyi yayigiriye ikamujugunya.

Umusaruro mubi iyi kipe ifite muri uyu mwaka w'imikino, wose barawushyira ku mutwe w'umutoza Arteta bashinja kutamenya gufata ibyemezo.

Abafana ba Arsena bamaranye igihe kirekire uburakari bwo kuba iyi kipe itari gutanga ibyishimo n'umusaruro mwiza kandi yari ikipe ifite igitinyiro i Burayi no ku Isi hose, gusa kuri ubu byose bikaba byaragiye hasi.

Nyuma yo gutsindirwa ku kibuga Emirates na Wolves ibitego 2-1, Abafana ba Arsenal bagiye ku mbuga nkoranyambaga basaba umutoza Mikel Arteta gusezera agasohoka muri Arsenal kuko ntacyo ari gufasha iyi kipe, ahubwo ari kuyirindimura, abandi bakavuga ko akwiye kugarura Ozil mu kibuga kuko ariyo ntandaro y'umusaruro mubi. 

Ni ubutumwa batanze babunyujije ku rukuta rwa Instagram rwa Arsenal ku mashusho y'incamake y'umukino iyi kipe yaraye itsinzwemo na Wolves yari yayisuye. Benshi basabye ko Arteta asezera, abandi basaba ko Ozil agaruka mu kibuga, abandi bavuga ko batiyumvisha impamvu amashusho nk'aya ashyirwa hanze bigakorwa gusa iyo batsinzwe.

Arsenal izakira Rapid Wien muri Europa League tariki ya 03 Ukuboza 2020, mbere y'uko ijya gusura Tottenham Hotspurs muri Premier League tariki ya 06 Ukuboza 2020.

UBUTUMWA BW'ABAFANA BA ARSENAL BUSABA ARTETA GUSEZERA

Arsenal yatsinzwe na Wolves iyisanze mu rugo 2-1

Arteta yasabwe kurekura ikipe ya Arsenal agasezera kubera umusaruro mubi






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND