Ubwenge bw’ubukorano buzaba bwongera miliyari ibihumbi 19.9$ ku bukungu bw’Isi mu 2030

Ibi byatangarijwe muri Kigali Convention Centre, ahari kubera Inama Mpuzamahanga ku Ikoranabuhanga ry’Ubwenge bw’Ubukorano muri Afurika, Global AI Summit on Africa. Yitabiriwe n’abarimo abayobozi mu nzego zifata ibyemezo, abashoramari n’abayobozi b’ibigo bikoresha ikoranabuhanga ry’ubwenge bw’ubukorano hirya no hino ku Isi.

Umuyobozi w’Ikigo cy’Impinduramatwara ya Kane mu by’Inganda, C4IR [Centre for the Fourth Industrial Revolution], Crystal Rugege, yavuze ko iyi nama ari ingenzi kuko igihe kigeze ngo Afurika itekereze ku kwifashisha AI mu buzima bwayo bwa buri munsi.

Rugege yerekanye ko mu 2030, ubwenge bw’ubukorano buzaba bwongera nibura miliyari ibihumbi $19.9 ku bukungu bw’Isi. Ni mu gihe Afurika yo izaba ibona inyongera ya miliyari ibihumbi $2.9 mu bukungu bwayo, biturutse mu kubukoresha.

Rugege yerekanye ko ibyiza by’ikoreshwa ry’ubwenge bw’ubukorano bitazizana ahubwo hakenewe kubiharanira, imiyoborere myiza n’ibindi bizafasha kugira ngo bigerweho.

Yerekanye ko inama nk'iyi ikwiye kuba umwanya mwiza wo gushyira urubyiruko imbere muri gahunda z’iterambere ry’ikoranabuhanga by’umwihariko iry’ubwenge bw’ubukorano muri Afurika, rugahabwa ubumenyi n’ubushobozi burufasha kugeza uyu Mugabane ku ntego zawo.

Komiseri ushinzwe Ibikorwaremezo n’Ingufu muri Komisiyo ya Afurika Yunze Ubumwe, Lerato Mataboge, yerekanye ko hagati ya 2020 na 2023, ikoreshwa ry’ubwenge bw’ubukorano mu rwego rw’ubuzima ryazanye ishoramari rishya rya miliyoni $550, ryatumye habaho ibigo bishya bigitangira bigera kuri 350 mu bihugu birindwi byo muri Afurika.

Ati: “Iri shoramari ryafashije Umugabane wa Afurika kubasha gukora inkingo ziramira ubuzima bw’abaturage n’ibindi bikenerwa mu rwego rw’ubuzima.”

Komiseri Lerato Mataboge yavuze ko ubwenge bw’ubukorano kandi bukomeje kwifashishwa n’ibigo by’imari bikoresha ikoranabuhanga bityo bigafasha abaturage kugerwaho na serivisi z’imari hirya no hino muri Afurika.

Yerekanye ko ikoranabuhanga ry’ubwenge bw’ubukorano [AI], rikomeje kugaragaza impinduramatwara mu buhinzi aho nibura abahinzi barenga miliyoni 30 bo muri Afurika bahinga ku buso buto bagerwaho n’amakuru abasha kubafasha kongera umusaruro.

Minisitiri w'Ikoranabuhanga na Inovasiyo, Paula Ingabire, yagaragaje ko kugira ngo Afurika ibashe kubyaza umusaruro ibyiza by’ikoranabuhanga ry’ubwenge bw’ubukorano, kwagura imikoranire n'ibihugu byo kuri uyu Mugabane no kubaka ibikorwaremezo bihagije biri mu bikenewe by'ibanze.

Minisitiri Ingabire yavuze ko u Rwanda rugeze kure ikoreshwa ry’ubwenge bw’ubukorano mu guhanga ibishya mu nzego zitandukanye zaba ubuhinzi, ubucuruzi, serivisi z’imari n’ibindi.

Yavuze kandi ko hari uburyo bunoze bwo kugenzura imikorere n’imikoreshereze y’ubwenge bw’ubukorano [AI] mu kugenzura ko ikoreshwa ryabwo riba riri mu buryo bunoze kandi bwubahirije amahame ngengamyitwarire.

Ati: “Ariko ikindi cy’ingenzi, ni yo mpamvu dufite iteraniro nk’iri, kubera ko iyo tuvuze AI, ntabwo u Rwanda rwayitekereza rwonyine, ahubwo ni byiza kubitekereza mu buryo bw’umugabane wose ndetse n’urwego rw’imikoranire ikenewe mu iterambere ry’ubwenge bw’ubukorano.”

Yabigarutseho mu kiganiro kigaruka ku mahirwe ari mu ikoreshwa ry’ikoranabuhanga ry’ubwenge bw’ubukorano, yahuriyemo n’abarimo Umunyamabanga Mukuru w’Isoko Rusange rya Afurika, Wamkele Mene; Minisitiri w’Itumanaho na Inovasiyo muri Nigeria, Bosun Tijani n’Umuyobozi Mukuru w’Ikigo Equity Group Holding, Dr. James Mwangi.

Iyi nama ya 'Global AI Summit on Africa,' yateguwe n’Ikigo cy’Impinduramatwara ya Kane mu by’Inganda, C4IR [Centre for the Fourth Industrial Revolution] ku bufatanye na Minisiteri y’Ikoranabuhanga na Inovasiyo n'Ihuriro Mpuzamahanga ry'Ubukungu, World Economic Forum. 

Abayitabiriye bari kuganira ku kwifashisha ubwenge bw’ubukorano mu kubyaza umusaruro amahirwe y’ubukungu buhishwe mu bakozi ba Afurika. 

U Rwanda rwakiriye inama mpuzamahanga ku ikoreshwa ry'ubwenge bw'ubukorano

Umuyobozi wa C4IR yerekanye ko mu 2030 AI izaba yongera miliyari ibihumbi 19.9 z'Amadolari ku bukungu bw'Isi

Komiseri Lerato Mataboge yatangaje ko ikoreshwa ry'ubwenge bw'ubukorano ryateje imbere urwego rw'ubuzima muri Afurika

Minisitiri Ingabire Paula yavuze ko u Rwanda rugeze kure rukoresha ubwenge bw'ubukorano mu guhanga udushya mu nzego zinyuranye