U Rwanda rwongeye kuza ku isonga mu koroshya urujya n'uruza ku Banyafurika

Ni ibikubiye mu cyegeranyo cy’Umuryango wa Afurika Yunze Ubumwe, AU, cyashyize u Rwanda mu bihugu biza ku isonga mu koroshya urujya n’uruza ku Banyafurika, gutangira ku gihe umusanzu no kwemeza byihuse amasezerano aba yashyizweho umukono n’uyu muryango.

Ethiopia, Kenya, u Rwanda, Repubulika ya Gambia na Tanzania ni byo bihugu biza ku isonga mu mpuzandengo y’amanota bashingiye ku bipimo 4 byubakiye ku nkingi zirimo koroshya urujya n’uruza hakurwaho viza, kwiyemeza gushyira umukono ku  masezerano yemejwe n’uyu muryango, gutangira ku gihe imisanzu ya buri gihugu, kwitabira kwakira inama z’uyu muryango no kuzitabira.

By'umwihariko, u Rwanda, Benin na Gambia ni byo byanikiye ibindi bihugu mu koroshya urujya n'uruza bivaniraho viza abaturage bo kuri uyu Mugabane.

Ubwo yari mu ihuriro rya 13 ry’ikigo mpuzamahanga cy’ubukerarugendo ryabereye i Kigali mu Gushyingo 2023, Perezida Paul Kagame yongeye guha ikaze abagana u Rwanda bitewe n'uko rwaguye amarembo.

U Rwanda kandi, runagaragara mu bihugu 3 bya mbere byihutira gushyira umukono ku masezerano bakanayemeza nk’amategeko igihugu kigenderaho, ndetse ruri mu bihugu 7 bya mbere bitangira ku gihe umusanzu bisabwa mu kunganira ingengo y’imari y'uyu Muryango wa Afurika Yunze Ubumwe.

Ni mu gihe ibihugu biza mu myanya ya nyuma birimo Centrafrique, Guinea, Liberia, Somalia n’ibirwa bya Sao Tome & Principe.

Si AU gusa ishyize u Rwanda mu myanya ya mbere mu koroshya urujya n’uruza ku Banyafurika, kuko na raporo ya Africa Visa Openness Index (AVOI) yashyizwe hanze mu Ugushyingo 2024, igaragaza ko u Rwanda ruri ku mwanya wa mbere. Uyu mwanya ruwuhuriyeho na Benin, The Gambia na Seychelles kuko byose byabonye amanota 1.000.

Iyi raporo igamije kurebera hamwe uko ibihugu byo muri Afurika byashyizeho ingamba na politike byorohereza ababagana, igaragaza ko ibijyanye no gukuriraho Visa Abanyafurika cyangwa koroshya uburyo bazibonamo ku mugabane bigenda birushaho kumvikana. Mu 2016 byari ku gipimo cya 20%, mu 2024 bigera kuri 28%. Mu myaka 10 byazamutseho 40%. 25% by’izi ngendo zo zisaba Visa abantu iyo bageze ku bibuga by’indege, mu gihe izidakenera Visa ari 28%.

Gusa ku rundi ruhande iyi raporo igaragaza ko iyi gahunda ikirimo imbogamizi kuko 47% by’ingendo zikorwa imbere ku Mugabane wa Afurika zigisaba Visa zakwa mbere y’urugendo.

U Rwanda ruri muri ibi bihugu byakuyeho visa ku baturage b’Abanyafurika barwinjiramo kuva mu myaka itandatu ishize.