Perezida Donald Trump yatangaje ko agiye gusinya itegeko ryemerera Minisiteri y'Ingabo na Minisiteri y'Umutekano w'igihugu gutegura ikigo cyakira abimukira muri Gereza ya Guantanamo. Yavuze ko izakira abantu 30,000, ikaba izakoreshwa mu gufunga "abimukira b'abanyabyaha bashyira mu kaga Abanyamerika."
Iki cyemezo kije mu gihe ubutegetsi bwa Trump buri gushyira mu bikorwa ingamba zikaze zo guhangana n'abimukira binjira muri Leta Zunze Ubumwe za Amerika mu buryo bunyuranyije n'amategeko.
Ku itariki ya 24 Mutarama 2025, indege za gisirikare za Amerika zatangiye kohereza abimukira bafatiwe mu gihugu basubizwa muri Guatemala nk'uko byategetswe na Perezida Trump. Izi ngamba zifite intego yo gukumira abimukira no kongera umutekano ku mupaka.
Gukoresha Guantanamo Bay nk'ikigo cyakira abimukira si igitekerezo gishya. Muri 2019, byatangajwe ko Perezida Trump yatekereje kohereza abimukira muri Guantanamo, abita "abanyamuryango b'imitwe y'iterabwoba," ariko icyo gitekerezo nticyavuzweho rumwe nk'uko tubikesha WSJ.com.
Abasesenguzi bavuga ko gushyira abimukira muri Guantanamo bishobora guhura n'imbogamizi z'amategeko n'uburenganzira bwa muntu ndetse bikaba byakongera umubare w'abafunzwe muri icyo kigo cyamamaye kubera gufungirwamo abakekwaho iterabwoba.
Kugeza ubu gereza ya Guantanamo ifite imfungwa 15, nubwo yagenewe kwakira imfungwa nyinshi biteganijwe ko ishobora kwagurwa ikakira ibihumbi 30. Ubutegetsi bwa Biden bwari bufite gahunda yo kugabanya uwo mubare mbere y'uko manda ye irangira.
Icyemezo cya Perezida Trump cyo gukoresha Guantanamo nk'ikigo cyakira abimukira kirakomeza guteza impaka mu gihugu, cyane cyane ku bijyanye n'uburenganzira bwa muntu n'ingaruka z'amategeko.
Guantanamo ni imwe muri Gereza zitinyitse ku Isi ndetse zitavugwaho rumwe bitewe n'iyica rubozo bivugwa ko rikorerwa abahafungiwe.
Niyo gereza ya mbere ku Isi icungiwe umutekano
Eng
RSS 
TANGA IGITECYEREZO