Mu gihe urugamba rugikomeje mu Burasirazuba bwa Repuburika Iharanira Demokarasi ya Congo, Abacanshuro bari baraje gufasha FARDC kurwanya M23 ndetse n'abakozi ba Banki y'Isi bakuyemo akabo karenge baza mu Rwanda kugira ngo babone uko bataha iwabo.
Kuva mu Cyumweru gishize, imirwano ikomeye hagati ya FARDC, Wazalendo, FDRL… barwana na M23, irarimbanyije aho benshi bamaze kuhatakariza ubuzima abandi bakaba baravuye mu byabo bagahunga.
Nyuma yo kubona ko barimo kuganzwa no gutsindwa n’ingabo z’umutwe wa M23, bamwe mu bacancuro barimo bafatanya na FARDC mu kurwanya M23 bemeye gushyira hasi intwaro zabo bamanika amaboko bemera kuva mu burasizuba bwa DRC.
Nk’uko bari babitangaje, M23 yavuze ko abazamanika amaboko bazafashwa kubona inzira bakava mu gihugu ku buryo bose babikoze intambara yahita ihagarara.
Ku mugoroba wo kuri uyu wa Kabiri nibwo amakuru yavugaga ko aba bacancuro bashobora kunyura mu Rwanda bagafatira indege mu Rwanda dore ko izindi nzira zose zabakura i Goma zifunze haba izo mu kirere, ku butaka no mu mazi.
Mu gitondo cyo kuri uyu wa Gatatu tariki 29 Mutarama 2025, abo bacancuro hamwe n’abakozi ba Banki y’Isi bakoreraga i Goma banyuze ku mupaka munini uhuza u Rwanda na DRC wa La Corniche.
Nk’uko byari biteganyijwe, aba bose bari kuza baherekejwe n’abarwanyi b’umutwe wa M23 kugira ngo bacungirwe umutekano hatagira ubahutaza mu nzira ziza mu Rwanda kugira ngo babone uko berekeza mu bihugu byabo.
Mu gihe aba bemeye gutaha, intambara yo irarimbanyije mu Burasirazuba bwa DRC ariko na none benshi mu bari gutsindwa, bari guhita birukira mu Rwanda dore ko abari kugira amahirwe yo kuhahungira bitabwaho haba mu buryo bw’ubuvuzi n’aho kuba.
Uyu munsi kandi hateganyijwe inama y’abakuru b’Ibihugu bigize umuryango wa Afurika y’Iburasirazuba mu rwego rwo gushaka uko bahosha iyi ntambara iri kubera mu burasirazuba bwa DRC.
AMAFOTO:RBA
Eng
RSS 
TANGA IGITECYEREZO