Dangote w'i Kinshasa yafatiwe i Burayi afite ibilo 200 bya Cocaine

Eric Mandala Kinzenga  afite umutungo udasanzwe buri gihe aho agiye hose, imodoka zigezweho nka Rolls-Royce, Lamborghini na Ferrari byamugaragazaga mu buryo bw’ikirenga. Afite inzu z'agatangaza mu mijyi minini nka Kinshasa, Johannesburg, Nairobi ndetse n'ahandi muri Paris na Dubai.

Ariko ibintu byahindutse nyuma y'urugendo rumwe rw'ubucuruzi yagiriye i Burayi. Mandala, usanzwe akoresha indege ze bwite, yafatiriwe ku kibuga cy’indege cya Madrid muri Espagne tariki 24 Mutarama 2025, akurikiranyweho gucuruza ibiyobyabwenge aho yari afite ibiro 200 bya Cocaine. Ibi byabaye ku bufatanye bw'inzego za DEA na Udyco nyuma y'iperereza ryamaze amezi menshi kuva muri Kanama 2024.

Mandala yafatanywe n’umugore wo muri Colombia, bafite amadolari  arenga  ibihumbi 50. Amakuru avuga ko yakoraga ibikorwa by’ubucuruzi nk'uburyo bwo guhisha ibiyobyabwenge hagati ya Amerika y'Epfo n'u Burayi. Polisi yasanze hari ubwato n’indege bwakoreshwaga mu gutwara ibi biyobyabwenge.

 Amakuru avuga ko Mandala yari afite imbaraga zikomeye mu buyobozi bwa DR-Congo, aho yakoresheje umutungo we mu kwigwizaho abakomeye kugira ngo abone uko akora ubucuruzi bwe. Byongeye kandi  ashinjwa gukorana n’ibigo by’ubugizi bwa nabi byo muri Afurika y’Uburengerazuba n'Amerika y’Epfo.

Mu makuru yavuzwe, Mandala yahakanye ibyaha byose aregwa, avuga ko yari yatezwe n'abamurwanya muri Business. Ariko, ibimenyetso by’amajwi n’ubutumwa bwatanzwe, hamwe n’imitungo ihurirwaho n'ubwo bucuruzi bw’ibiyobyabwenge, byabaye ibimenyetso bikomeye bidashobora kwirengagizwa nk'uko tubikesha Intelregion.

Niba ahamwe n'ibyaha, Mandala azahura n’igihano cy’igifungo cya burundu. 

Eric Mandala, Umuherwe wo muri DR-Congo wafatanywe ibiyobyabwenge byo mu bwoko bwa Cocaine ibiro 200

Eric Mandala hamwe n'umunya-Cilombia bafatanywe barikumwe