Basusurukijwe na Juno! Kate Bashabe yasangiye Noheli n'abana 1000 abagenera ibikoresho by'ishuri

Ni igikorwa cyabaye kuri uyu wa Gatanu tariki 27 Ukuboza 2024, aho aba bana biga mu mashuri abanza bahawe ibyo kurya no kunywa ndetse n'ibikoresho by'ishuri birimo amakayi, amakaramu n'ibikapu byo kubitwaramo.

Tuyisenge Jean Felix ni umwe muri aba bana bahawe ubufasha ugeze mu mwaka wa gatandatu w'amashuri abanza. Yavuze ko ibikoresho yahawe yabyishimiye ndetse bigiye kumufasha mu kunoza imyigire ye, ku buryo azabasha kwiga neza kugira ngo azabashe gutsinda neza.

Yagize ati: "Ndumva meze neza ku bikoresho nahawe, bikaba bigiye kumfasha kongera imyigire yanjye, niga neza kandi nakora neza kugira ngo nzatsinde ikizamini cya Leta."

Umwe mu babyeyi b'abana bahawe ibi bikoresho, Iradukunda Donatha yavuze ko yishimiye kuba babatekerejeho bakagenera abana babo ibikoresho cyane ko ari kimwe mu bibagora cyane bijyanye n'ubushobozi budahagije bafite.

Ati: "Njye ku giti cyanjye byanshimishije kuko ni ubwa mbere mbonye ikintu cy'inkunga cy'igikoresho cy'umwana wanjye. Byangoraga rero, kubona ibikoresho birangora amafaranga y'ishuri n'ibindi bikangora, ariko ni ukuri byanshimishije cyane pe.

Kate Bashabe yabwiye abana ko uretse gusangira na bo ibyishimo bya Noheli, yatekereje no kubafasha kwiga neza, bagatsinda.

Ati: "Icyaduhurije hano ni ugusangira Noheli ariko ikindi gikomeye ni ukubashyigikira mu myigire yanyu. Kuko iyi mwize mukubaha ababyeyi, mukubaha abarimu, bizatuma mutsinda neza."

Kate yakomeje abwira abana bahawe ibikoresho by'ishuri ko icyo Igihugu kibifuzaho ari ukuzaba abantu bakomeye.

Ati: "Kubera ko natwe tuba twitanze tukavuga ngo reka turebe ikintu  twafasha abana b'Igihugu. Namwe rero muzige, mutsinde neza kuko icyo tubifuzaho ni ukuzaba abantu bakomeye, abaganga, abasirikare, abayobozi. Ejo hazaza ni mwe Igihugu gihanze amaso."

Yasobanuye ko yahisemo gutanga umusanzu we mu burezi, kuko usanga umubare w'abana benshi bata ishuri babiterwa no kubura ubushobozi bwo kwishyura amafaranga y'ishuri, kugura ibikoresho nkenerwa n'ibindi.

Akomoza ku cyamusunikiye gukora iki gikorwa, yagize ati: "Ni umutima wo gufasha umuntu aba afite, kandi ibi bikorwa tugenda dukora bigira ingaruka nini ku bandi bantu.

Twebwe intego yacu ni uko abana bashobora kwiga neza, kandi nsaba n'Abanyarwanda muri rusange, umuntu wese ufite ubushobozi ntabwo ari ngombwa ko buba bwinshi, dushyire hamwe dufashe igihugu cyacu, dufashe abana basubire mu ishuri, tubafashe kwiga, n'ibindi bintu byinshi. 

Nashishikariza Abanyarwanda bakurikirana ibikorwa dukora, ntabwo tuba tubikora kugira ngo tubirateho, twiyemere ko dufite byinshi ahubwo ni ukugira ngo natwe urukundo Imana yaduhaye [...]."

Umuyobozi Nshingwabikorwa w'Akarere ka Kicukiro, Mutsinzi Antoine, yashimiye Kate Bashabe, avuga ko igikorwa cyiza yakoze gikwiye kubera abandi urugero.

Yasabye abana bagize amanota mabi mu gihembwe cyashize kwikubita agashyi.

Ati: "Iyo turi mu bihe nk'ibi biba ari ibyo gutekereza ibyiza twakoze kugira ngo tubisigasire, aho twakoze nabi twikosore kugira ngo dutangirane umwaka ingamba nshya. Mujye muzirikana urukundo bakuru banyu baba babereka, si uko bafite byinshi ahubwo ni uko bafite umutima mwiza."

Yashimiye Kate Bashabe wateguriye abana umunsi mukuru ndetse akiyemeza gusangira na bo Noheli abagenera ibikoresho bizabafasha mu masomo yabo, aragira ati: "Uburezi niyo mpano ikomeye. Kuko iyo utumye umwana yiga neza, utuma na we abasha gutekereza icyo yakorera abandi igihe na we azaba amaze kugira aho agera."

Uretse gusangira n’aba bana, Kate Bashabe yabahaye impano ziganjemo ibikoresho by’ishuri bazifashisha mu gihembwe gitaha cy’amasomo yabo.

Kate Bashabe yasangiye Noheli n'abana bagera ku 1000 b'i Masaka mu Karere ka Kicukiro

Kate yavuze ko yahisemo gutanga ubufasha bwe mu gushyigikira uburezi bw'abana baturuka mu miryango itishoboye kuko ari bo Rwanda rw'ejo

Ni igikorwa cy'urukundo asanzwe akora buri mwaka

Abana bahawe ibikoresho bizabafasha mu myigire yabo birimo ibikapu, amakayi n'ibindi

Ababihawe bavuze ko bigiye kubafasha kurushaho gutsinda neza mu myigire yabo

Umubyeyi wa Kate Bashabe yari yitabiriye mu rwego rwo gushyigikira umukobwa we mu gukora igikorwa cy'urukundo

Ni igikorwa yari yishimiye cyane

Byari ibyishimo bikomeye ubwo Pele Noel yahasesekaraga

Aha uwaje ahagarariye Ingabo z'u Rwanda yafashaga umwana gupfundura icyo kunywa

Umuyobozi Nshingwabikorwa w'Akarere ka Kicukiro, Mutsinzi Antoine yashimiye byimazeyo Kate Bashabe watekereje gutanga umusanzu ukomeye mu burezi bw'abana

Umuhanzi Juno Kizigenza ni umwe mu batumye umunsi uba mwiza kurushaho

Yabasusurukije yifashishije ibihangano bye byagiye bikundwa n'abatari bacye

Kate Bashabe na we yafatanyije n'abana kwizihirwa

Byari ibyishimo gusa gusa

Kanda hano urebe amafoto menshi yaranze iki gikorwa

AMAFOTO: Doxivisual - InyaRwanda