Perezida William Ruto na Madamu we Rachel Ruto basangije Abanyakenya ubutumwa bwo kubifuriza umwaka mushya muhire na Noheri nziza, bashishikariza ubumwe no kubaho mu mwuka w'ubufatanye mu gihe cy'iminsi mikuru.
Inkuru dukesha ikinyamakuru Capital News ivuga ko Perezida William Ruto yashimiye Abanyakenya ku bw'imbaraga zabo no ku bwitange bwo guharanira impinduka mu gihugu, avuga ko intambwe ikomeye imaze guterwa mu kubaka Kenya ikomeye, itekanye kandi iteye imbere.
Yanashimiye abaganga n'abakozi bo mu rwego rw'ubuzima, abasaba gukomeza gukora neza mu guharanira ubuzima bw'abaturage.
Madamu Rachel Ruto wigeze kuba umwarimu, yashimangiye akamaro k'uburezi no guhangana n'imbogamizi ziterwa n'inzara mu mashuri. Yagaragaje ko ifunguro ryiza rihindura ubuzima bw'umwana, kandi ko ari ngombwa gutanga amahirwe angana ku bana bose.
Madamu Rachel Ruto yashishikarije Abanyakenya guteza imbere uturima tw'igikoni, kugira ngo buri muryango ugire ifunguro ryiza kandi ryuzuye.
Byongeye kandi, Perezida Ruto yongeye kugaruka kuri gahunda ya guverinoma yo gutera ibiti miliyari 15 bitarenze umwaka wa 2032, hagamijwe kongera ubuso bw'ishyamba mu gihugu. Yasabye Abanyakenya gufatanya muri iki gikorwa, avuga ko gutera ibiti ari igikorwa cy'icyizere cyo kubaka ahazaza heza.
Ubutumwa bw'uyu muryango bukangurira Abanyakenya kugira uruhare mu kubaka igihugu gikomeye.
Perezida William Ruto na Madamu Rachel Ruto
Umwanditsi: KUBWIMANA Solange
Eng
RSS 
TANGA IGITECYEREZO