Inkuru mbi muri Real Madrid ishobora kubera nziza Kylian Mbappé

Iyi kipe yabitangaje kuri uyu wa Mbere tariki ya 25 Ugushyingo 2024, ibinyujije ku mbuga nkoranyambaga zayo aho yavuze ko nyuma y'uko uyu mukinnyi akorewe isuzuma basanze yaragize ikibazo cy'imikaya ku kuguru kwe kw'ibumoso.

Iki kibazo cy'imvune Vinicius Junior yakigiriye mu mukino ikipe ya Real Madrid yatsinzemo Leganes ibitego 3-0 ku munsi w'ejo ku Cyumweru muri shampiyona.

Nubwo iyi kipe itatangaje igihe uyu mukinnyi azamara adakina ariko ibinyamakuru bitandukanye byanditse ko ashobora kuzamara igihe kingana n'ibyumweru bitatu aho azasiba imikino irimo uwa Liverpool muri UEFA Champions League kuri uyu wa Gatatu kuri Anfield.

Iyi nkuru ntabwo ari nziza ku ikipe ya Real Madrid n'abafana bayo ariko ushobora kubera nziza Kylian Mbappé. 

Uyu mukinnyi ntabwo yagize intangiriro nziza nyuma y'uko yerekeje muri Real Madrid mu mpeshyi y'uyu mwaka aho benshi bagaragaza ko ikibitera ari ukubera adakinishwa ku mwanya yari asanzwe akinaho muri Paris Saint-Germain n'ikipe y'igihugu y'u Bufaransa.

Ni ku mwanya w'Ibumoso usanzwe ukinaho Vinicius Junior ariko ubwo bivuze ko noneho ariwo agiye kujya akinishwaho muri iyi minsi nk'uko byagenze ku munsi w'ejo ku Cyumweru ndetse bikaza gutuma atsinda igitego.

Kugeza ubu, Kylian Mbappé amaze gukina imikino 12 ya shampiyona muri Real Madrid akaba amaze gutsindamo ibitego 7 ndetse akaba yaranatanzemo umupira umwe wakivuyemo. Ni mu gihe muri UEFA Champions ho amaze gukina imikino 4 akaba yaratsinzemo igitego 1 ndetse akaba yaratanzemo umupira umwe wakivuyemo.

Vinicius Junior wagize ikibazo cy'imvune akaba agiye kumara ibyumweru 3 adakandagira mu kibuga 

Kylian Mbappé ashobora kungukira mu bihombo bya Vinicius Junior