Umukino wa Mozambique na Mali mu gushaka itike y'igikombe cy'Afurika ushobora kudakinwa

Ku wa Gatanu w'iki Cyumweru Saa Kumi n'Ebyiri z'umugoroba nibwo biteganyijwe ko ikipe y'igihugu ya Mozambique izakira iya Mali barikumwe mu itsinda I kuri Estádio do Zimpetomu mu mukino wo ku munsi wa 5 mu yo gushaka itike y'igikombe cy'Afurika cya 2025.

Uyu mukino ariko ushobora kudakinwa bitewe n'imyigaragambyo iri muri Mozambique dore ko habura iminsi mike muri iki gihugu bakinjira mu matora ya Perezida.

Biteganyijwe ko kuva kuri uyu wa Gatatu kugeza ku wa Gatanu aribwo hazaba imyigaragambyo ikomeye dore ko abafite imodoka babujijwe kuzikura mu rugo bijyanye n'uko abaturage baraba buzuye mu mihanda batwika ibintu bitandukanye.

Ku munsi w'ejo ku wa Kabiri abakinnyi n'abatoza b'ikipe y'igihugu ya Mozambique bakoze ikiganiro n'itangazamakuru basaba abaturage kuba bashyize ku ruhande ibijyanye na politiki ubundi bakazajya kubashyigikira ariko biba iby'ubusa.

Ikipe y'igihugu ya Mali yamaze kugera i Maputo muri Mozambique ariko imyigaragambyo niramuka ibaye uyu munsi, impuzamashyirahamwe y'umupira w'amaguru ku Mugabane w'Afurika, CAF irahita isubika uyu mukino maze Mali ihabwe amanota 3 nk'uko biheruka kugenda kuri Nigeria.

Kugeza ubu ikipe y'igihugu ya Mozambique niyo iyoboye itsinda I n'amanota 8 inganya na Mali ya Kabiri.

Umukino wa Mozambique na Mali ushobora kudakinwa kubera imyigaragambyo