Dezman yavuze ibyagejeje kuri Album yitiriye umukobwa we agiye kumurikira mu Budage

Yavuze ko iyi ndirimbo yahisemo kuyitirira umukobwa we ‘kubera ko ari igisobanuro cy’ubuzima bwanjye’. Ati “Navuga ko imibanire yanjye n’umukobwa wanjye ariyo yangejeje mu kuba nakoreye iyi ndirimbo kugeza ubwo ariwe nyitiriye." 

Akomeza ati “Nayitiriye umukobwa wanjye kubera ko ariwe nayandikiye. Uretse muri rusange Album niwe nayitiriye, kuko ni umwana wanjye wa kabiri, kandi na Album yanjye ya kabiri nayise ‘Ubuheta’ rero urumva ko bifitanye isano.”

Kuri Album ye ya Kabiri, avuga ko amaze gushyira hanze indirimbo ebyiri zirimo ‘Land we Love (Rwanda Nziza)’, ‘Shine Your Light’ ndetse na ‘Tesire’ yitiriye umukobwa we.

Dezman yavuze ko kuva mu 2003 ari mu muziki yumvaga ko uko byagenda kose agomba gukora Album. Ati “Buri muhanzi wese agomba umuzingo w’indirimbo, cyane cyane nkatwe dukora umuziki wa ‘Live’ ugomba kugira urutonde rw’indirimbo zawe ukina.”

“Ibi bintu nabitangiye cyera. Hari indirimbo natangiriyeho yitwa ‘Wimbabaza’ yumvikanaga cyane kuri Radio, ibyo bintu narabikoze kugeza ubwo mvuye mu Rwanda mu 2007 nyuma y’iyo myaka yose rero ejo bundi muri Covid-19 nibwo umuntu wanjye yavutse, icyo gihe ni nabwo nakoze EP ya mbere ijya hanze abantu barayikunda, nsubira noneho mu muziki.”

Yavuze ko nyuma yo gushyira hanze EP yabonye ko abantu bakunze ibihangano bye, bituma anatekereza gukora Album. Yavuze ko umukobwa we yavutse ‘mu gihe niyumvagamo cyane urukundo rw’umuziki no kuwusubiramo bituma rero mwitirira iyi Album’.

Avuga ati “Iyi Albu nayitiriye umukobwa wanjye kubera ko muri icyo gihe ntangira kuyikora nawe yari avutse, hari ukuntu umukobwa wanjye yabaye imvano yo gukora iyi Album, ari nayo mpamvu hariho indirimbo ye, izindi zikaba zivuga ku ngingo zinyuranye.”

Mu mashusho y’iyi ndirimbo agaragaza ko umubano w’umubyeyi n’umwana mu bihe bitandukanye. Agasobanura ko n’ubwo ishingiye kuri we n’umukobwa we, ariko yanakwifashishwa na buri mubyeyi mu kugaragariza urukundo umwana we. 

Dezman usanzwe abarizwa mu Mujyi wa Frankfurt mu Budage, avuga ko muri Gashyantare 2025 ari bwo azashyira ku isoko iyi Album yose muri rusange. Ni mu gihe asanzwe afite ku isoko album ya mbere yise “Magic Hour”. 

Yavuze ko ateganya gukorera igitaramo mu Budage no mu Rwanda cyo kumurika iyi Album. Ati “Yego ndateganya kuyimurikira mu Budage nimara gusohoka hanyuma nzaza mu Rwanda ahagana muri Mata 2025 nyimurikire Abanyarwanda n’abandi.”      

Dezman yaherukaga kuririmba mu iserukiramuco ryabaye muri Gicurasi 2024 ryitwa “Africa Fiesta Frankfurt” ryari ryubakiye ku nsanganyamatsiko yo guhesha agaciro ibihangano by’Afurika. 

Ryaranzwe n’ibikorwa birimo kugaragaza imyambaro ihangwa n’Abanyafurika, ibitaramo by’abahanzi, abashushanya, abakora imikino y’abana, ubukorikori n’ibindi byahanzwe n’abakomoka ku Mugabane wa Afurika ariko babarizwa muri Frankfurt.  

Ibikorwa by’abatoranyijwe byagaragajwe muri iri serukiramuco biri no mu murongo wo kubimenyekanisha ku rwego rw’Isi no kubishakira amasomo hirya no hino.

Dezman yatangaje ko muri Gashyantare 2025 azamurika Album ye ya Kabiri yise ‘Ubuheta’ 

Dezman yavuze ko umubano we n’umukobwa we ariwo wagejeje ku kumwitirira Album ye nshya  

Dezman yavuze ko iyi Album azayimurikira mu Rwanda ndetse no mu Budage muri Mata 2025  

KANDA HANO UREBE AMASHUSHO Y’INDIRIMBO ‘TESIRE’ YA DEZMAN YITIRIYE UMUKOBWA WE

">

KANDA HANO UREBE INDIRIMBO 'HOME SWEET HOME' DEZMAN YAKORANYE NA RAS KAYAGA

">