Kugeza ubu isoko ry'igura n'igurisha rigeze aharyoshe aho amakipe atandukanye akomeje kugura abakinnyi bo kuzayifasha gukina neza mu bihe bizaza.
Manchester United na Real Madrid zikomeje gukangaranya isi y'umupira w'amaguru ku isoko ry'igura n'igurisha muri iyi mpeshyi. Umukinnyi mwiza isi isigaranye ari we Mbappe yagiye muri Real Madrid, naho Manchester United itangira kwibikaho abakinnyi bato beza.
Abakinnyi 10 basinyiye amakipe meza
10. Daichi Kamada
Daichi Kamada ni umuyapani wasinyiye Crystal Palace avuye muri Lazio yo mu Butaliyani. Kamada ukina mu kibuga hagati yageze muri Crystal Palace ku buntu, imwegukana imukuye mu nzara na Eintracht Frankfurt nayo yamwifuzaga.
9. Archie Gray
Uyu Archie Gray wasinyiye Tottenham Hotspur ni umwe mu bana babicaga bigacika muri Leeds United. Kugira ngo Tottenham Hotspur yegukane uyu mukinyi byayitwaye Miliyoni 30£, iba yegukanye umukinnyi w'imyaka 18 y'amavuko.
8. Alvaro Morata
Nyuma y'uko Alvaro Morata atandukanye na Atletico Madrid yerekeje muri Milan AC yo mu Butaliyani. Byasabye Miliyoni 10.9£ kugira ngo yegukane Alvaro Morata uje asimbura Olivier Giourd wagiye muri Leta Zunze Ubumwe za Amerika.
7. Savinho
Uyu Savinho ni umwana muto wasinyiye Manchester City avuye muri Troyes. Kugira ngo Man City yegukane uyu mukinyi ukomoka muri Brazil, byasabye miliyoni 30.8£
6. Jossua Zirkzee
Jossua Zirkzee ukomoka mu Buhorandi ni we mukinnyi wa mbere Manchester United yasinyishije kuva yagera mu biganza bya INEOS. Uyu rutahizamu wavuye muri Bologna, yatwaye Miliyoni 35£ kugira ngo asinye imyaka itanu muri Manchester United.
5. Leny Yoro
Umufaransa w'imyaka 18 y'amavuko Leny Yoro yaguzwe na Manchester United imukuye muri Lille. Man United yegukanye uyu mukinnyi imuvanye mu nzara za Real Madrid na Liverpool. Leny Yoro yatwaye Miliyoni 52.2£ kugira ngo asinye imyaka itanu muri Manchester United.
4. Joao Palhinha
Umunya Portugal Joao Palhinha w'imyaka 28 y'amavuko wavuye muri Fulham, yerekeje muri Bayern Munich, ikipe yifuzaga uyu mukinnyi kubura hasi hejuru. Bayern Munich byayitwaye Miliyoni 47£ kugira ngo yegukane uyu munya Portugal ukina mu kibuga hagati.
3. Douglas Luiz
Umunya Brazil Douglas Luiz, kwerekeza muri Juventus nabyo byatitije isi ya ruhago ubwo yavaga muri Aston Villa. Juventus byayisabye Miliyoni 42.2£ kugira ngo yegukane uyu mukinyi imukuye imbere ya Arsenal nayo yari yaramubengutse.
2. Michael Olise
Umufaransa Michael Olise yavuye muri Crystal Palace ajya muri FC Bayern Munich mu Budage avuye mu nzara za Manchester United, Liverpool na Chelsea nazo zamwifuzaga.
1. Kylian Mbappe
Iza rya Kylian Mbappe muri Real Madrid avuye muri Paris Saint-Germain, riracyatitiza isi y'umupira w'amaguru. Mbappe wahoze arota gukinira Los Blankos, umunsi amasezerano ye yarangiye muri Paris Saint-Germain, ni bwo yageze ku nzozi ze zo gukinira Real Madrid, cyane ko yagendeye Ubuntu.
Gusinyisha Kylian Mbappe muri Real Madrid ni inkuru ikivugisha benshi ku isoko ry'igura n'igurisha
Bayern Munich yacecekesheje Manchester United, Chelsea na Arsenal izitwara Michael Olise
Manchester United nayo ikomeje gukangaranya amakipe atandukanye ku isoko ry'igura n'igurisha
TANGA IGITECYEREZO