Cristiano Ronaldo wakoze ibiteye isoni mu ruhame yihagazeho nyuma yo gusabwa ibisobanuro

Mu mpera z'icyumweru gishize imikino ya shampiyona y'icyiciro cya mbere muri Arabia Saudite igeze ku munsi wa 21 yarakomezaga, ikipe ya Al Nassr itsinda Al Shabab ibitego 3-2, muri ibi bitego 3 harimo icyatsinzwe na kizigenza Cristiano Ronaldo ku munota wa 21 kuri penariti.

Muri uyu mukino abafana na Al Shabab umukino ugitingira baririmbye Lionel Messi bagira ngo barakaze Cristiano Ronaldo nk'uko n'abandi bafana basanzwe babigenza muri Arabia Saudite.

Uyu mukinnyi w'imyaka 39 nawe akimara gutsinda igitego yahise ajya kukishimira imbere yabo akora ibiteye isoni. Yabanje gufata ku matwi ubundi arangije afata ikiganza agishyira imbere y'ubugabo bwe akajya amanura azamura.

Ibinyamakuru birimo Marca, Daily Mail byahise bitangira kwandika ko ishyirahamwe ry'umupira w'amaguru muri Arabia Saudite ryatangiye kumukoraho iperereza ngo rirebe impamvu yaba yarabikoze kubera ko ibintu nk'ibi biteye isoni bitajyana n'imico n'imyemerere yo muri Arabia Saudite.

Ikindi kandi byahuzwaga no kuba yarabikoze agira ngo yerekane ko uwitwa Lionel Messi adashoboye gutera akabariro nk'uko we abikora.

Kuri ubu Cristiano Ronaldo yasabwe ibisobanuro n'akanama gashinzwe imyitwarire mu ishyirahamwe ry'umupira w'amaguru muri Arabia Saudite maze avuga ko yubaha amakipe yose ndetse ko ibyo yakoze bidosobanuye ibindi bintu biteye isoni.

Yagize ati "Nubaha amakipe yose ... kandi kuzunguza amaboko byerekana imbaraga n'intsinzi. Ntabwo bisobanuye ibiteye isoni. Mu Burayi, ibi turabimenyereye".

Nubwo uyu mukinnyi yatanze ibi bisobanuro ariko ashobora gufatirwa ibihano birimo gusiba imikino 2 adakina ndetse no guhanishwa amafaranga.

Kugeza kuri ubu Cristiano Ronaldo ari gukina umwaka we wa kabiri w'imikino muri Arabia Saudite ndetse ni nawe mukinnyi umaze gutsinda ibitego byinshi muri shampiyona y'uyu aho afite 22 mu mikino 20.