Baribaza amaherezo y’ibiciro birushaho kuzamuka ku masoko y’ibiribwa

Abacuruzi n’abaguzi batandukanye bahuriza ku ngaruka ziterwa n’iri zamuka ry’ibiciro, harimo gukomera k’ubuzima, guhomba mu bucuruzi ndetse no kubura ubushobozi bwo kwihaza mu biribwa n’ibindi.

InyaRwanda yasuye bamwe mu bacuruzi bakorera mu isoko ryo kwa Mutangana ndetse no muri Ejo heza Morden Market Nyabugogo, baganira uko ubucuruzi buhagaze.

Bamwe mu bacuruzi bacururiza mu isoko ryo kwa Mutangana bavuze ko ibiciro byazamutse bikomeye, kandi ko inzara iteye ubwoba.

Niyirora Marie Rose yagize ati: “Kuva Covid yaba ibiciro by’ibiribwa byarazamutse cyane, kandi iyo bizamutse bituma abakiriya bagabanuka.”

Akomeza avuga ko iyo ibiciro bizamutse, bituma abaguzi bagura ibyihutirwa ibindi ntibigurwe.

Mukakarisa Liberata we yavuze ko n’ubwo ibiciro byazamutse bidasanzwe, hari ibiribwa byageze ku giciro gitangaje.

Yagize ati: “Ubugari twitabazaga ikilo kiri kugura amafaranga 1000, ikiro cy’ibishyimbo cyageze ku 1700, ibijumba ibase twaguraga ibihumbi 3000 yageze ku bihumbi 8000”.

Nyirazaninka Ramu uranguza ibirayi mu isoko ryo kwa Mutangana, avuga ko ikiro cy’ibirayi cyaguraga amafaranga 300 ariko ubu kigeze ku mafaranga 550, kandi ngo abona biteye ubwoba kuko rubanda rugufi ntabwo bari kubasha kugaburira abana babo.

Ati: “Ubu kinini tuyiranguza 620 tukayicuruza kuri 650, naho ibirayi by’umweru  twita “kirundo” tubiranguza 530 Rwf tukabicuruza kuri 550 Rwf”.

Ram avuga ko ibirayi bihenze no mu bwikorezi bwabyo, ku bigura byo bikaba ibindi bindi

Ibibazo byagaragajwe n’abakorera mu isoko ryo kwa Mutangana bijya gusa n’ibyo abakorera Ejo heza Modern Market bafite, kandi benshi bahuriza ku kibazo cy’inzara.

Abacuruzi bo muri Ejo Heza Modern Market nabo bavuga ko imboga nazo ari nkeya ku isoko, ndetse n’izihari zirahenze cyane.

Uwantege Florence ucuruza imboga muri iri soko yavuze ko nta na kimwe gihendutse, ko ahubwo buri kimwe kiyongereye, hakaba harya uwifite.

Yagize ati “Niba ibishyimbo byumye bigura 1300 Rwf, ibitonore bikagura 1500 Rwf, urumva ko ari ibintu biteye ubwoba”.

Ikiro cy’inyanya kiri kugura amafaranga 1000 kivuye kuri 500, mu gihe amaronji atatu yaguraga 100 none ubu ikiro kigeze kuri 700. Bavuga ko umwembe waguraga 250 ariko ubu ukaba ugeze kuri 400.

Mukashema Ruth ukorera muri iri soko yagize ati: “Nk’ubu ikiro cy’inyanya kiri kugura 1000 Rwf, mbere cyaraguraga 500 Rwf cyangwa 700 Rwf. Ubuse twarya duhereye hehe?”

Aba bagore basaba Leta ko yagira icyo ibafasha mu kugabanyirizwa imisoro, basaba n’ikigo cy’igihugu cy’ubuhinzi n’ubworozi kubashakira imbuto nziza y’ibirayi ndetse bagafungura imipaka bakabasha guhahirana no mu bindi bihugu.

Inama y’umushyikirano yabaye ku nshuro ya 18 yagarutse ku kibazo cy’izamuka ry’ibiciro, nka kimwe mu bibazo byari byitezweho ko bizaganirwaho muri iyi nama y’igihugu. Minisitiri w’Intebe Edouard Ngirente muri iyi nama, yahumurije abanyarwanda avuga ko batigeze babibagirwa.

 Ati: “Nagiraga ngo mbahe ihumure, Leta ntabwo yigeze itererana abanyarwanda muri iki kibazo. Hari byinshi byakozwe kuva ibiciro byazamuka”.

Yakomeje avuga  ati “Mu rwego rwo kugabanya igihombo ku bahinzi n’aborozi giterwa n’ihindagurika ry’ikirere, hashyizweho gahunda y’ubwishingizi ku bahinzi n’aborozi, harimo kandi nkunganire ya Leta ingana na 40%” nk’uko yabigarutseho mu nama y'Umushyikirano.

Abacuruzi bavuga ko n’ubwo badashimishijwe n’ibiciro biri ku masoko, ariko barashimira Leta y’u Rwanda ko idahwema kubareberera kandi barizera ko izakomeza kubafasha kubona umuti w’iki kibazo.

Uretse kuba imboga zihenze, nta n’ubwo zihagije ku isoko, kandi ibyo biri gutera abantu inzara

iri soko ubusanzwe ryabaga ryuzuye imboga z'ubwoko bwose, ariko ibintu byahinduye isura

Umuceri wa pakisitani warahenze, kuburyo wageze ku bihumbi bibiri (2000)

Imyembe irya umwe igasiba undi, kuko umwembe ugeze kuri 400