Ahabanza Imikino

Ibyo wamenya ku mikino y'igikombe cy'Isi cyujuje imyaka 92 gikinwa

Yanditswe na: ISHIMWE Olivier Ba
Taliki:8/11/2022 14:47 0

Qatar igiye kwakira imikino y'igikombe cy'Isi kigiye gukinwa ku nshuro ya 20 gusa, imyaka ikaba ibaye 92 iyi mikino itegurwa.

Kuva tariki 20 Ugushyingo kugera tariki 18 Ukuboza uyu mwaka muri Qatar, haraba hari kubera imikino y'igikombe cy'Isi mu mupira w'amaguru. Ni igikombe kigiye gukinirwa ku nshuro ya 20, kuko iyi mikino iba buri nyuma y'imyaka 4. Iyi mikino yabayeho bwa mbere mu 1930, ibera mu gihugu cya Uruguay. Iyi mikino yitabiriwe n'amakipe 13 harimo 7 yo muri Amerika Y'Epfo, 4 yo ku mugabane w'i Burayi ndetse n'andi abiri yo muri Amerika ya ruguru.

Ibihugu bigera kuri 31 kongeraho Qatar izaba yakiriye imikino bagiye guhatanira igikombe cy'Isi kiruta ibindi ku Isi

Iyi mikino yaje kwegukanwa na Uruguay itsinze Argentina ibitego 4-2, Leta Zunze Ubumwe za Amerika ziba iza gatatu zitsinze Yugoslavia.

Iyi mikino itegurwa n'impuzamashyirahamwe y'umupira w'amaguru ku Isi FIFA, ndetse ikaba ari nayo ishyiraho amategeko agenga iri rushanwa n'imigirire yaryo.

Kwitabira iyi mikino bisaba iki?

Buri gihugu kiba muri FIFA bigendanye n'umugabane kibamo, kigomba kwitabira imikino y'amajonjora ayiganisha ku mikino ya nyuma.

Nibura mu myaka 3 haba hari kuba imikino y'amajonjora, isiga habonetse amakipe 31 agomba kwitabira iyi mikino. Igihugu kizakira iyi mikino gihita kibona itike bidasubirwaho kigasanga bya bihugu 31 byavuye ku Isi yose, bikaba ibihugu 32 ari nabyo bikina iyi mikino kugera magingo aya.

Umupira wakinwe mu mikino y'igikombe cy'isi bwa mbere

Mu 2018 nibura ibihugu 79 byari bimaze kwitabira iyi mikino, bivuze ko muri Qatar ibihugu bizaba bimaze kuba 80 kuko Qatar ari ubwa mbere igiye kwitabira iyi mikino.

Mu myaka 92 ishize, igikombe cy'Isi kimaze kwegukanwa n'ibihugu 8 gusa, Brazil igifite inshuro 5, ndetse ikaba ikipe yonyine rukumbi itarasiba iyi mikino, Ubudage n'Abatariyani bamaze kwegukana iki gikombe inshuro 4, Argentina, u Bufaransa na Uruguay bamaze kucyegukana inshuro 2, u Bwongereza na Espagne bamaze kucyegukana inshuro 1.

Ibihugu 17 bimaze kwakira imikino y'igikombe cy'Isi

Brazil, u Bufaransa, u Butariyani, u Budage, na Mexico bamaze kwakira iyi mikino inshuro 2, kongeraho Uruguay, Switzerland, Sweden, Chile, England, Argentina, Espagne, Leta Zunze Ubumwe za Amerika, Ubuyapani na South-Korea (bifatanyije), Afurika y'Epfo, n'u Burusiya bose bacyakiriye inshuro imwe.

Usibye ibihugu byose byitabiriye imikino y'igikombe cy'Isi bwa mbere, u Butariyani nicyo gihugu cyonyine kitabiriye iyi mikino bwa mbere cyikanayegukana. Aha byari mu 1934. Misiri nicyo gihugu cya mbere cyo muri Afurika cyitabiriye imikino y'igikombe cy'Isi.

Igikombe cy'Isi kiba kigizwe n'amatsinda 8, buri tsinda ririmo amakipe 4