Bari bahinduye urugo akabari! Abakinnyi ba Etincelles FC bafashwe barenze ku mabwiriza yo kwirinda COVID-19

Aba bakinnyi bafatiwe mu rugo rw’uwitwa Marie Chantal Mukeshimana bahahinduye akabari, barenze ku mabwiriza asanzwe yo kwirinda Covid-19 kuko amasaha ateganyijwe yo kuba bageze mu ngo zabo yari yarenze.

Umuvugizi wa Polisi mu Ntara y’Iburengerazuba, CIP Bonavanture Twizere Karekezi, avuga ko abarimo abakinnyi n’abandi bafite ibikorwa bituma bakurikirwa cyane n’umubare utari muto w’abaturage bari bakwiye kuba intangarugero, bakaba abafashamyumvire mu bukangurambaga.

Yagize ati “Mu by’ukuri bariya ni bo bari bakwiye kuba intangarugero, mu kugaragaza ko bafasha urundi rubyiruko, babakangurira kurwanya iki cyorezo cya Covid-19. Iki cyorezo abantu bakwiye kumenya ko gihari ntaho cyagiye, rero uyu ntabwo ari wo mwanya wo kurenga ku mabwiriza ahubwo iki ni cyo gihe cyo gukaza amabwiriza cyane ko Leta imaze gushyiramo imbaraga nyinshi ikingira abaturage bayo, bikaba byari bikwiye kujyana no kuzamura imyumvire biciye muri abo bakaba intangarugero mu kubahiriza amabwiriza 100%”.

Uyu muyobozi yavuze ko bitari bikwiye ko abantu bakomeza kwijandika mu bikorwa byo kurenga ku mabwiriza yo kwirinda Covid-19.

Nyuma yo gufatwa bahise barazwa muri stade y’Akarere ka Rubavu, baraganirizwa, bacibwa n’amande nk’uko ateganywa n’inama njyanama y’Akarere.

Abakinnyi bafashwe ni Ally Moussa, Casey Njoh, Fosso Fabrice, Karisa Samuel, Murengezi Lodrigue, Bahati Marcel, na Nsabimana Patrick.