Yavukiye gutsinda! Sergio Aguero waranze amateka ya Man City ni muntu ki?

Amazina ye yose yitwa Sergio Leonel Aguero Castillo bakunze kwita Kun Aguero, yavukiye muri Argentina mu 1988 bivuze ko ubu ari umugabo w'imyaka 32 y'amavuko.

Buenos Aires niho havukiye uyu musore ufite metero imwe na santimetero 73, akaba akina nka rutahizamu nomero 9. Aguero yatangiriye umupira w'amaguru iwabo muri Argentina ahagana mu 1997 ubwo yari mu ikipe y'abato ya Independiente.

Aguero yemeje ko atazakomezanya na Man City 

Kuva mu 2003 Aguero yazamuwe mu ikipe nkuru ndetse atangira gukina nk'umukinnyi ugenderwaho muri Independiente. Mu myaka 3 yayimazemo yayikiniye imikino 54 ayitsindira ibitego 23.

Mu 2006 Aguero yaje kurabukwa n'ubuyobozi bwa Atletico Madrid ayerekezamo ari naho yaje kwigaragaza nka rutahizamu ushobora kuzatanga akazi kuri ba myugariro bariho ku isi. Mu mikino 175 yakiniye Atletico Madrid yayitsindiye ibitego 74 aho ni ukugeza 2011.

Kun Aguero ubwo yakiniraga Atletico Madrid 

Ubwo Manchester City yari itangiye ikiragano cyo kuba ikipe ikomeye iburayi, yazengurutse isi yose ishakisha abakinnyi bayifasha kandi b'amazina ari nabwo yabengutse Kun Aguero inshuti ya Messi y'akadasohoka.

Kuva mu 2011 kugeza ubu, Aguero amaze gukinira Manchester City imikino  384 ayitsindira ibitego 257 bituma aba umukinnyi w'ibihe byose watsindiye aba banyamujyi ibitego byinshi.

Rutahizamu w'Argentina 

Mu myaka isaga 10 Sergio Aguero yari amaze muri Manchester City yatwayemo ibikombe 13 birimo premier league 4 League 5 FA cup 1 ndetse na Community Shields 3.

Mu ikipe y'igihugu Aguero yagiranye urugendo rurerure na mukuru we Lionel Messi  haba mubihe bigoye bari kumwe ndetse n'ibihe twakita ko byari iby'inseko bari kumwe ariko nti babasha gutwara igikombe.  

Muri Atletico Madrid niho yeretse isi ko azavamo uwo ariwe kugeza ubu 

Mu 2004 nibwo yakiniye ikipe ya Argentina y'abatarengeje imyaka 17, mu mikino 5 atsinda ibitego 3 yerekeza mu batarengeje imyaka 20 kuva 2005/07 akina imikino  11 atsinda ibitego 7. Nyuma ni bwo mu 2006 kugera ubu ari kwitangira Argentina aho amaze kuyikinira imikino 97 ayitsindira ibitego 41.