RFL
Kigali

Amakipe 12 mu Rwanda amaze kugaragaramo abakinnyi banduye COVID-19

Yanditswe na: SAFARI Garcon
Taliki:22/12/2020 11:12
0


Mu bipimo biheruka gufatwa mu makipe atandukanye mbere yuko abakinnyi boherezwa mu ngo zabo, hagaragaye andi makipe mashya arimo abakinnyi banduye COVID-19, arimo Sunrise FC, yagaragayemo abakinnyi batatu n'umuganga, Kiyovu Sports na Etincelles yagaragayemo abakinnyi 8 banduye.



Mu cyumweru kimwe gusa shampiyona yakinwe na mbere yaho gato kugeza magingo aya, harabarurwa amakipe 12 amaze kugaragaramo abarwayi ba Coronavirus.

Nyuma y'isubikwa rya shampiyona y'icyiciro cya mbere yakinwe imikino itatu gusa, Minisiteri ya siporo yategetse Ishyirahamwe nyarwanda rya ruhago 'FERWAFA' gupimisha abakinnyi b'amakipe yose yo mu cyiciro cya mbere, ubundi abakinnyi bakajya mu ngo zabo mbere y'uko hasohoka itangazo riha amakipe uburenganzira bwo gusubira imyitozo.

Amakipe menshi yarabikoze, ndetse ayasuzumwe mbere bagasanga abakinnyi ari bazima bahise boherezwa mu ngo zabo. Mu gitondo cyo kuri uyu wa kabiri tariki ya 22 Ukuboza 2020, hamenyekanye amakuru y'uko ikipe ya Sunrise FC nayo yagaragayemo abarwayi ba COVID-19.

Amakuru ava mu bari hafi y'iyi kipe yemeza ko abakinnyi batatu ndetse n'umuganga wabo basanzwemo COVID-19, bikaba byatumye iyi kipe iguma mu kato.

Muri Kiyovu Sports hagaragaye umukinnyi umwe wanduye icyorezo cya Coronavirus.

Mu gihe amakuru ava i Rubavu mu bari hafi y'ikipe ya Etincelles FC, ari uko Abakinnyi barindwi n'umwe mu bagize Staff y'iyi kipe basanzwemo Coronavirus.

Aya makipe atatu yiyongereye ku yandi Icyenda yari yagaragayemo iki cyorezo mu minsi itambutse, arimo  Rayon Sports, APR FC, AS Kigali, Marines FC, Rutsiro FC, Amagaju FC, Musanze FC, AS Muhanga  na Alpha FC.

Ku wa kane tariki ya 24 Ukuboza 2020, hateganyijwe inama izahuza FERWAFA n'amakipe 16 akina icyiciro cya mbere, izibanda ku gikwiye gukorwa kugira ngo shampiyona isubukurwe.

Etincelles FC yagaragayemo abantu 8 banduye COVID-19

Kiyovu Sports yagaragayemo umukinnyi umwe wanduye Coronavirus

Sunrise FC yagaragayemo abantu bane banduye Coronavirus





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND