RFL
Kigali

Min.Rosemary Mbabazi na Ingabire Paula basabye gushyigikira abanyarwandakazi 7 bahatanira guserukira EAC muri Miss Career Africa

Yanditswe na: Janvier Iyamuremye
Taliki:15/09/2020 12:44
0

Minisitiri w’Urubyiruko n’Umuco, Rosemary Mbabazi na Minisitiri w'Ikoranabuhanga na Inovasiyo, Ingabire Paula, basabye abaturarwanda gushyigikira abanyarwandakazi barindwi bahatanira guserukira Afurika y’Iburasirazuba muri Miss Career Africa 2020.



Tariki 12 Nzeri 2020, nibwo abategura irushanwa rya Miss Career Africa batangaje abakobwa 15 barimo abanyarwandakazi barindwi batangiye gushakishwamo 10 bazaserukira EAC muri Miss Career Africa 2020.

Aba banyarwandakazi ni Rachel Mukashema, Clémence Tuyishimire, Genevieve Iranyuze Atosha, Mugisha, Mutesi Betty, Mignone Gisele Irankunda na Inema Nadege.

Mu butumwa yanyujije ku rukuta rwe rwa Twitter, Minisitiri w'Ikoranabuhanga na Inovasiyo, Ingabire Paula, yavuze ko abanyarwandakazi barindwi bari mu bakobwa 15 bari gushakishwamo abazaserukira EAC muri Miss Career Africa.

Ingabire Paula yasabye abantu gushyigikira aba bakobwa binyuze ku itora riri kubera kuri internet ku rubuga rwa Miss Career Africa. Yavuze ko gushyigikira aba abakobwa ari “ugufungura amahirwe yabo mu burezi no kugeza ku nzozi zabo.

Minisitiri w’Urubyiruko n’Umuco, Rosemary Mbabazi, we yavuze ko u Rwanda rwishimiye kuba rufite abakobwa 7 bahatanira guserukira EAC muri Miss Career Africa izasorezwa mu Rwnada.’

Yasabye abantu bose guhuza imbaraga bakabatora kuri internet. Mbabazi yasabye by’umwihariko urubyiruko gutora aba bakobwa kugira ngo bazabashe gutsinda. Ati “Tubari inyuma bakobwa bacu.”

Kugeza ubu, abanyarwandakazi bari imbere mu majwi yo kuri internet aho bakurikwie n'umunya-Kenya.

Muri Afurika y’Iburasirazuba hitabiriye abakobwa benshi, ariko 15 ni bo babonye amanota meza abemererera guhatana. Abakobwa bo muri Afurika y’Iburasirazuba baritabiriye ugereranyije no mu tundi duce two muri Afurika.

Akanama nkemurampaka ka Miss Career Africa 2020 kahisemo aba bakobwa kagendeye ku buryo umushinga wa buri umwe wakoreshwa mu gace cyangwa igihugu akomokamo.

Akamaro umushinga we wagira muri sosiyete muri rusange, uburyo umushinga we wamubyarira inyungu n’uko azakoresha inguzanyo azahabwa.

Kagendeye kandi ku bisubizo umushinga we uzaba uzanye, ugereranyije n’ibibazo bitandukanye byugarije abantu muri rusange ndetse n'ubwenge cyangwa ubushobozi nyir'umushinga abufiteho.

Harebwe kandi ku dushya n’umwihariko umushinga we ufite, ugereranyije n’indi mishinga ijya gusa n’uwe cyangwa ihuje nawo.

Abakobwa 15 bemerewe guhagararira Akarere k’Afurika y’Iburasirazuba barimo barindwi bo mu Rwanda, babiri bo mu Burundi, batatu bo muri Kenya, umwe wo muri Tanzania na babiri bo muri Uganda. 

Soma: Abakobwa 15 barimo abanyarwandakazi barindwi barahatanira guserukira Afurika y'Iburasirazuba muri Miss Career Africa 2020

Aba bakobwa bahise binjira mu ijonjora rizakorerwa kuri internet (Online Voting) rizamara ukwezi kumwe, aho 10 ba mbere bazagira amajwi menshi, ari bo bazitabira umwiherero wa Miss Career Africa mu Ugushyingo 2020.

Abategura iri rushanwa rya Miss Career Africa bamenyesheje buri mukobwa watsinze, bati "Ubu ngubu Isi yose igiye kumenya ko watoranyijwe mu kindi cyiciro cya Miss Career Africa. Wagaragaje umushinga wawe neza kuburyo byanyuze akanama nkemurampaka. None ni cyo gihe ngo umenyeshe inshuti, n'umuryango ko wakomeje ndetse ko bagomba kugushyigikira bagutora kuri internet.”

“Kuba watambutse muri iki kiciro, ni ibigaragaza ko ushobora no gutwara ikamba rya Miss Career Africa 2020. Igihe ni iki ngo ukore cyane, Amahirwe Masa.”

Abakobwa 23 bo mu bice bitandukanye bya Afurika bamaze gutoranwa barimo 10 bo muri Afurika y’Iburengerazuba, 10 bo muri Afurika y’Amajyepfo na batatu bo muri Afurika y’Amajyaruguru. Kugeza ubu ntiharaboneka abo muri Afurika yo Hagati.

Minisitiri w’Urubyiruko n’Umuco, Rosemary Mbabazi yasabye urubyiruko gushyigikira abakobwa 7 bahatanira guserukira EAC muri Miss Career Africa

Minisitiri w'Ikoranabuhanga na Inovasiyo, Ingabire Paula yasabye abaturarwanda gutora bashishikaye abanyarwanda 7 bari muri 15 bahatanira kwitabira Miss Career Africa 2020



Umunyarwandakazi Rachel Mukashema

Clemence Tuyishimire

Genevieve Iranyuze Atosha

Naome Mugisha

Mutesi Betty

Mignone Igisele irankunda

Inema Nadege






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND