Umuyobozi wa Twitter yemeye gutanga inkunga ya Miliyari y’Amadolari yo kurwanya Coronavirus

Muri iyi minsi abantu benshi batandukanye bari kugenda batanga inkunga zo gufasha mu kurwanya Coronavirus bitewe n'uko bifite. Kuri ubu utahiwe ni Jack Dorsey uyobora urubuga rwa Twitter.

Jack Dorsey wemeye ko agiye kwitanga Miliyari y’amadolari y’Amerika. Akomeza avuga ko iyi mfashanyo agiye gutanga ingana na 28% by'umutungo we wose. Ibi yabitangaje ku rubuga rwa Twitter aho yavuze ko kuri ubu ari byo byihutirwa kurusha ibindi.

Dorsey avuga ko azifashisha imigabane afite muri Square mu kubona amafaranga y'iyo mfashanyo, akazayatanga abinyujije mu kigo 'Start Small Foundation'. Impamvu ni uko imigabane myinshi yo muri ‘Square’ ari iye. Bikaba bizatuma ariyo akoresha mu gutanga ubufasha aho gukoresha iyo muri Twitter. 

Iyo migabane avuga ko izagenda itangwa uko igihe kigenda gihita kuko hari icyo bizahindura ku gaciro kayo ndetse no ku ngano y'imfashanyo yose muri rusange.

Yavuze ko igihe icyorezo cya Covid-19 kizaba "kimaze kuneshwa", iyo mfashanyo izahita ikomereza mu gufasha mu bindi, birimo ubuzima ndetse  n'uburezi bw'abakobwa. Nubwo Dorsey yatanze iyi nkunga ntabwo yasobanuye neza aho iyo mfashanyo izoherezwa mu gufasha kurwanya Covid-19.

Ibi byatumye abantu benshi bibaza niba atazayitanga mu gihugu akomokamo cya Leta Zunze Ubumwe za Amerika kore ko kuri ubu muri iki gihugu hari ikibazo cy'ubucye bw'ibyuma bya 'Ventilators' bifasha abarwayi ba Covid-19 gukomeza guhumeka, ndetse n'ibikoresho byo kurinda abantu bidahagije.

Mu magambo Dorsey yakomeje gutangaza ku rubuga rwa Twitter yavuze ko ashaka gufasha mu nzego azabona icyo zigezeho, igihe cyose azaba akiriho kubera iyo mfashanyo. Yahise anatangaza ko 'link' ijyana ku nyandiko yo kuri Google izajya igaragaza ku mugaragaro iyo mfashanyo n'uko ikoreshwa.

Dorsey ntabwo ari we wenyine mu batunze ama Miliyari y’Amadolari usezeranyije ko azatanga igice cy'umutungo we mu kurwanya coronavirus. Hari n'abandi benshi babikoze barimo Mark Zuckerberg washinze Facebook watanze Miliyoni 30 z'amadolari, inyinshi muri zo zizakoreshwa mu bikorwa byo gushaka umuti wa Coronavirus.

Jeff Bezos, umukuru wa Amazon akaba ari nawe muntu ukize cyane kurusha abandi bose ku Isi, yatanze imfashanyo ya Miliyoni 100 z'amadolari ku magaburiro rusange (Food banks) yo muri Amerika, mu gufasha abashonje muri iki gihe.

Mu kwezi kwa gatatu, Tim Cook ukuriye Apple yatangaje ko kompanyi ye izatanga imfashanyo y'ibikoresho byo mu buvuzi ku Butaliyani bwashegeshwe n'iyi virusi. Gusa n'ubwo aba baherwe batanga imfashanyo, abantu benshi babanenga uburyo bakoresha bazitanga.

Umuyobozi wa Twitter yemeye gutanga akayabo mu kurwanya Covid-19

Src: bbc.com