Pastor Theogene yabwirije anasetsa abatuye i Nyamirambo benshi bakira agakiza-AMAFOTO+VIDEO

Ni igiterane cyari gifite insanganyamatsiko igira iti 'Ejo Heza mu mudugudu' iboneka mu Itangiriro 41:35. Cyabaye tariki 28/09/2019 kibera i Nyamirambo kuri Tapis rouge. Abantu barenga 20 biganjemo urubyiruko bakiriye agakiza biyegurira Yesu nyuma yo gukorwaho n’ubuhanya bwa Pastor Theogene wahoze mu biyobyabwenge akaza kwakira agakiza ubu akaba ari umupasitori mu itorero rya ADEPR Kimisagara.

Pastor Theogene ubwo yabwirizaga ab'i Nyamirambo

Iki giterane cyayobowe na Alain Numa wo muri MTN Rwanda akaba ari nawe wakiriye ku ruhimbi Pastor Theogene. Ageze kuri stage, Pastor Theogene yabwiriye ab’i Nyamirambo muri bwa buryo bwe abwirizamo anasetsa, benshi bakorwaho cyane. Yavuze uko yisanze ku muhanda, utubyiniro yabyinnyemo, uko yanyweye urumogi asoreza ku nkuru nziza y’uko yakiriye agakiza, abo babanaga ku muhanga bakamuseka bakamubwira ngo ‘Babiloni bazamurangije’. Aha bavugaga ko abakristo bamusengeye agakizwa. 

Pastor Theogene yavuze ko Yesu ateze amaboko ngo yakire abari mu byaha abahe amahoro adatangwa n'isi. Yunzemo ati "Niyo mpamvu abantu banywa itabi njye ntabwo mbanga, ndabakunda nubwo uyu munsi arinywa ejo yaba umukozi w'Imana akagirira umumaro igihugu, akagirira umumaro itorero akagirira umumaro sosiyete nyarwanda. Umunsi bansengeraga kuba pasiteri njye bariya bana bo ku muhanda narabatumiye. Bariya bajama narabatumiye mbashakira kwasiteri ibatwara."

Alain Numa hamwe na Pastor Theogene

Agashya kabereye muri iki giterane ni imodoka irimo stage yagakoreshejwe muri iki giterane. Mu biterane by’ivugabutumwa hano mu Rwanda, ni bwo bwa mbere iyi modoka ikoreshejwe ndetse by’akarusho abitabiriye iki giterane batangarijwe ko abazayikenera bose bazoroherezwa uko bayibona. Perezida w'itsinda ry'abagabo ryateguye iki giterane, Bwana J.Claude Bimenyimana yashimiye Imana yabahaye iminyago y’abakiriye agakiza.

Ubwo yavugaga ku mpamvu bateguye iki giterane yabwiye Inyarwanda ati: "Nk'abagabo bakijijwe bakora umurimo w'Imana mu itorero Shiloh, twasanze hageze y'uko dusohoka tukabwira abandi Imana twabonye ishoboye byose. Isi yugarijwe n'ibyaha byinshi, gusambanya abana, gukubita abagore, kwicana mbese ibyinshi bibi, tuza gusanga natwe twafata iya mbere tugafatanya n'izindi nzego gukumira ibyo byose. Nta kundi byagerwaho rero atari uguhamagarira buri mugabo wese gukizwa akamenya Imana ko ari cyo cyamufasha kuva muri ibyo bibi byose."

Muri iki giterane hanatangiwemo ubutumwa bukangurira abantu gahunda ya Leta ya ‘Ejo heza’ yo kwiteganyiriza, bagakora bazirikana kwizigamira kugira ngo ejo habo hazabe heza. Ibi byanahujwe n’ijambo ry’Imana, basabwa gukora ibyiza mu gihe cyabo bakava mu byaha. Pastor Theogene yigishije ko kuba muri Yesu bigufasha kugira Ejo heza. Alain Numa wayoboye iki giterane yashimiye cyane itsinda ry’abagabo bateguye iki giterane. Aba banashimiwe kandi n’umuyobozi w’akagari iki giterane cyabereyemo by’umwihariko abashimira inkunga ya mituweli 30 bahaye imiryango itishoboye.

AMAFOTO Y'IKI GITERANE 'EJO HEZA MU MUDUGUDU'

Bari kuririmba bahagaze mu modoka yari irimo stage

Itsinda ryateguye iki giterane

Bakiriye agakiza bava mu byaha nyuma yo gufashwa na Pastor Theogene

REBA HANO PASTOR THEOGENE ABWIRIZA ABATUYE NYAMIRAMBO

AMAFOTO: Mugunga Evode-InyaRwanda Art Studio

VIDEO: Niyonkuru Eric-Inyarwanda.com