iTel
Kigali

Mu masezerano ya Bisengimana yasinye muri Bugesera FC hari ibyo yasabwe - VIDEO

Yanditswe na: Mihigo Saddam
Taliki:19/06/2019 11:14
0

Kuri uyu wa Kabiri tariki 18 Kamena 2019, ikipe ya Bugesera FC yemeje ko yasinyanye amasezerano na Bisengimana Justin kugira ngo azayibere umutoza mukuru mu gihe cy’imyaka ibiri y’imikino iri imbere.



Nk'uko bigaragara kuri Twitter y'ikipe ya Bugesera FC, Bisengimana Justin yasinye imyaka ibiri muri Bugesera FC aho asimbuye Muhire Hassan wari umutoza w’agateganyo kuva igihe Seninga Innocent yasezereye muri iyi kipe yari abereye umutoza kuva tariki 28 Kanama 2018 kugeza kuwa 18 Werurwe 2019.

Nyuma yo gusinya imyaka ibiri muri Bugesera FC nk’umutoza mukuru, Bisengimana yemerewe kwishakira abazamwungiriza ndetse akaba yasabwe n’ubuyobozi ko muri shampiyona 2019-2020 atagomba kubura mu makipe arindwi (7) ya mbere.

“Nasinye amasezerano y’imyaka ibiri y’imikino. Icyo abayobozi bansabye n’uko ikipe itazabura mu myanya irindwi ya mbere. Nanjye icyo nabasabye n’uko bamfasha nkabona abakinnyi bazamfasha kugera kuri uwo mwanya”. Bisengimana


Bisengimana Justin aheruka muri Sunrise FC 

Bisengimana Justin avuga ko agiye kwicara agatangira gutecyereza ku bakinnyi abona bazabasha kumufasha kugera ku ntego za Bugesera FC.

Bisengimana Justin yageze muri Sunrise FC tariki ya 4 Nzeli 2018 nyuma yo kuva muri Police FC aho yari umutoza wungirije. Icyo gihe yasinyemo umwaka umwe w’imikino 2018-2019, gusa akaba yaravuye muri iyi kipe umwaka utarangiye kuko yasohotsemo tariki ya 3 Gicurasi 2019.

Bisengimana Justin yageze muri Sunrise FC tariki ya 4 Nzeli 2018 nyuma yo kuva muri Police FC aho yari umutoza wungirije, uyu mugabo yavuye muri Sunrise FC tariki ya 4 Nzeli 2018.

Bisengimana asanze Bugesera FC yarasaruye umwanya wa 12 muri shampiyona 2018-2019 n'amanota 35 ndetse ikaba yarageze muri 1/8 cy'igikombe cy'Amahoro 2019 aho bakuwemo n'Intare FA.


Bisengimana Justin arasabwa ko Bugesera FC izasoza mu myanya irindwi (7) muri shampiyona 2019-2020

Bisengimana Justin kuri ubu ufite impamyabumenyi ya CAF Licence A, yageze muri Police FC mu  ntangiriro z’umwaka w’imikino 2016-2017 aho yari yungirije Seninga Innocent kugeza hagati muri 2018, yatoje amakipe nka Sorwathe FC (2009-2012), Etoile de l’Est (2012-2014) na Gicumbi FC (2014-2016) mbere yo kuza muri Police FC mu mwaka w’imikino 2016-2017 akahava mu 2018.


Bisengimana Justin yemerewe kwishyiriraho abazamwungiriza muri Bugesera FC ndetse akanihitiramo abakinnyi azakinisha


2018-2019 Bugesera FC yasoje ari iya 12 n'amanota 35 muri shampiyona inaviramo muri 1/8 mu gikombe cy'Amahoro 2019









Inyarwanda BACKGROUND