Twasuye ku kazi Tom Close uherutse guhabwa inshingano na Guverinoma y’u Rwanda –VIDEO

Muri iki kiganiro twibanze ku buryo Tom Close yakiriye inshingano ze nshya, uko yabimenye yewe n'uburyo azahuza izi nshingano n’akazi gasanzwe ka muzika. Uyu muhanzi yageneye ubutuma abahanzi bakizamuka abasaba kwita ku kazi kabo kandi bakagira intego. Tom Close yibanze ku kugira inama zo kudacika intege ku bakiri bato.

Dr Muyombo Thomas cyangwa se Tom Close izina akoresha muri muzika...

Tom Close yamenyekanye mu muziki kuva mu myaka ya za 2007, akaba yarakoranye indirimbo n’abahanzi b’ibyamamare ku isi ndetse no mu karere nka Sean Kingston, Umunyamerika ukomoka muri Jamaica, Goodlyfe na Eddy Kenzo bo muri Uganda, Big Farious n’abandi. Uyu mugabo wubatse akaba se w’abana babiri kandi yanahuriye mu bitaramo n’abahanzi bakomeye ku isi nka Shaggy ubwo MTN yizihizaga imyaka icumi.

Tom Close ni umu papa w'abana babiri

Dr Muyombo ni umuganga w’umwuga kuko yize mu ishami ry’ubuganga muri Kaminuza y’u Rwanda, asoza amasomo ye ari dogiteri ‘Medecin Generaliste’. Mu buvuzi, Dr Muyombo yatangiriye akazi ke k’ubuganga mu byahoze ari ibitaro bya Polisi bya Kacyiru, ari nako abifatanya n’indi mirimo itandukanye akora nk’ubuhanzi bw’indirimbo ndetse no kwandika ibitabo by’abana. Aherutse guhabwa inshingano nshya zo kuyobora ikigo cy’igihugu gishinzwe gutanga amaraso, ishami rya Kigali mu gihe yari asanzwe ari umukozi w’ikigo cy’igihugu cyita ku buzima (RBC).