England: Callum Hudson-Odoi yahamagawe mu ikipe y’igihugu abanza kubifata nk’ibihuha

Kuwa Mbere tariki 19 Werurwe 2019  nibwo Callum Hudson-Odoi yavuye mu rugo aho aba mu mujyi wa Londre ajya mu mwiherero w’ikipe y’igihugu y’u Bwongereza y’abakinnyi batarengeje imyaka 21 bari kwitegura imikino ibiri ya gucuti bazahuramo n’ibihugu nka Poland n’u Budage. Saa tanu n’iminota 30 z’igitondo (11:30 AM) nibwo uyu musore yari asoje ibilometero 140 uva i Londre ujya aho umwiherero wari uri.

Akimara kugera mu mwiherero yahamagawe na Aidy Boothroyd umutoza w’ikipe y’igihugu y’abakinnyi batarengeje imyaka 21 amubwira ko atari bugumane n’abandi ahubwo ko Gareth Southgate umutoza w’ikipe y’igihugu nkuru amutegereje i St George Park aho ikipe iri gukorera umwiherero bitegura umukino bafitanye na Czech Republic mu rugendo rwo gushaka itike y’igikombe cy’u Burayi cya 2020. Umukino uteganyijwe kuri uyu wa Gatanu.

Callum Hudson Odoi (uwa kabiri uva ibumoso) ubwo yari ageze mu mwiherero w'ikipe nkuru y'Abongereza

Callum Hudson-Odoi yarongeye akora ibilometero 140 agana i St George Park asangayo bagenzi be bari barahamagwe mbere kuko uyu musore yaje mu bakinnyi bahamagawe nyuma ngo basimbure abataritabiriye ubutumire.

Callum Hudson-Odoi yaje mu buryo bumwe n’ubwa James Ward-Prowse wa Southampton, abakinnyi bahamagae nyuma yuko abarimo; Luke Shaw, Ruben Loftus-Cheek, Fabian Delph na John Stones bavuyemo kubera imvune. Jordan Henderson wa Liverpool nawe yageze mu myitozo nyuma yo koroherwa n’imvune yagize bakina na Bayern Munich muri UEFA Champions League.

Callum Hudson-Odoi yabashije gukina iminota 119 mu ikipe ya Chelsea muri uyu mwaka w’imikino yari mu bakinnyi bahamagawe mu ikipe y’igihugu  y’abatarengeje imyaka 21 ariko birangira ahamagawe mu ikipe y’igihugu nkuru.

Mu gihe uyu musore yakina umukino Abongereza bafitanye na Czech Republic, yahita ajya mu bitabo by’abakinnyi b’Abongereza babashije gukinira ikipe y’igihugu nkuru ari bato nyuma ya Wayne Rooney.

Akimara kugera mu mwiherero w’ikipe y’igihugu nkuru, Callum Hudson-Odoi yavuze ko ubwo yari avuye mu ikipe y’igihugu y’abatarengeje imyaka 21 bamwohereje mu nkuru yumvaga bamubeshye ndetse akagira ngo umutoza we wabimubwiye ari kumukinisha. Gusa ngo arishimye cyane kuba yaragiriwe icyizere.

“Byari ibihe bidasanzwe kuri njye kumva inkuru ko nahamagawe mu ikipe nkuru. Wari umunsi mure mure kuri njye ariko ukaba umunsi w’ibyishimo no kwiga ibintu bishya. Nabanje kugira ngo Aidy Boothroyd ari kunkinisha bisanzwe. Nabanje gusa naho mpungabana ariko nyuma nishyiramo ko ngomba kugenda, gusa sinabyizeraga”. Odoi

Hudson-Odoi yakomeje agira ati” Ubu ndi gukora cyane nkanisihimira buri munota ndi kuba ndimo nkorana n’abandi  kandi ndizera ko bizagira icyo binyungura kuko amahirwe yo yabonetse”. Odoi

Callum Hudson Odoi yari amaze gukina iminota 119 muri Chelsea 

Dore abakinnyi b’u Bwongereza bahamagawe:

Abanyezamu: Jordan Pickford, Jack Butland, Tom Heaton.

Abakina inyuma: Trent Alexander Arnold, Ben Chilwell, Michael Keane, Harry Maguire, Danny Rose, James Tarkowski, Kieran Trippier, Kyle Walker.

Abakina hagati: Ross Barkley, Dele Alli, Eric Dier, Jordan Henderson, Declan Rice.

Abataha izamu: Harry Kane, Marcus Rashford, Jadon Sancho, Raheem Sterling, Callum Wilson.