Hari abagiye bumva amakuru avuga ko Apotre Dr Gitwaza wo mu Rwanda na Pastor Robert Kayanja wo muri Uganda baba bakorana n'imyuka mibi. Aya makuru yamaganiwe kure n'abakristo benshi, gusa hari n'abayemeye. Kuri ubu rero habonetse andi makuru avuga kuri aba bagabo.
Umukobwa w'umunyarwandakazi witwa Mutoni wiyemerera ko yabaga ikuzimu agakorera satani igihe kitari gito, yatanze ubuhamya mu rusengero rwa Zion Temple mu Gatenga rukuriwe ku isi na Apotre Gitwaza, avuga byinshi ku mabanga ya satani ndetse anavuga uburyo sekibi yahagurukiye kurwanya yivuye inyuma Apotre Dr Gitwaza na Zion Temple. Uyu mukobwa yanavuze ko ari we wahimbye amakuru avuga ko Apotre Dr Gitwaza ajya ikuzimu.
Mutoni uvuga ko yari umukozi wa satani wemewe n'amategeko, yakomeje avuga ko satani yanarwanyaga bikomeye Pastor Robert Kayanja uyobora itorero Miracle Centre Cathedral ryo muri Uganda. Intandaro yo kurwanya aba bagabo bombi, ngo ni uko ari bo bapasiteri bari bakinaniranye kwa satani nk'uko Mutoni abyitangiramo ubuhamya. Intego nyamukuru ngo yari ugusenya/gukuraho burundu amatorero yatangijwe n'aba bapasiteri bombi. Mutoni witwaga Queen ikuzimu mu buhamya bwe yagize ati:
Mwigeze kumvaho inkuru ngo pasiteri (Aravuga Gitwaza) ajya ikuzimu? Ni wo mwambaro mubi bari baramushyizeho. Ni abahungu babiri bawanditse, igitekerezo ni njyewe wakizanye. Ni abapasiteri babiri bari bakinaniranye, Pastor Kayanja na Pastor Apostle (Aravuga Gitwaza). Haleluya. Njyewe rwose ntabwo nari nzi ibyambayeho, naherutse nkubitwa inshyi bambwira ngo ninsohoke, nongeye gushiduka ndi ahangaha, sinzacika intege gukorera Uwiteka.
Mutoni wiyemerera ko yajyaga ikuzimu
Mutoni yakomeje avuga uburyo yakoreye satani akajya atwara ikuzimu abakobwa bo mu rusengero rwa Robert Kayanja. Uyu mukobwa uvuga ko yasengeraga muri Zion Temple mu Gatenga, basirimba na we agasirimba ariko mu by'ukuri atajyanywe no gusenga ahubwo ari ku kiraka cya satani, yavuze ko no muri Zion Temple naho yari ahafite gahunda yo kuhakura abakobwa n'abamama abakashyira satani. Ngo yavaga mu Rwanda akajya muri Uganda nta cyangombwa na kimwe afite. Iturufu yamufashaga kwambuka umupaka ngo ni uburanga yari afite. Yagize ati:
Yesu ashimwe! Ikuzimu mwaba muzi uko hasa? Muzi gukorera satani uri mutoya ukuntu bibabaza? Muzi igikomere mfite mu mutima? Ndakeka buri umwe wese azanyanga kubera ubuhamya bwanjye. Bageze ahongaho bakajya (abadayimoni) bantuma abakobwa bo kwa Kayanja. Natwayeyo abakobwa babiri, mbashukishije amafaranga. Ni ahangaha (Zion Temple/Gatenga) ni ko byari bimeze, aba ushers (aba protocols/abadiyakoni) bamwe bari bagiye kugenda. Ariko mumbaze umunsi wa mbere byangendekeye gute? Naraje, yego nemeraga ko nakizwa ariko numva ntareka n'umuryango wundi nabonye hepfo (ikuzimu) kuko ni wo wanyitayeho. Byageze aho ngaho bigera ku ntera yo hejuru, ndatoroka mu Rwanda njya Uganda, nta cyangombwa na kimwe, just nari mfite ubwiza ngira ngo abandi batabona. Satani yari yaranyambitse iyindi shusho. (...)
Icyo Apotre Dr Gitwaza yavuze ku buhamya bwa Mutoni (Queen)
Nyuma y'ubuhamya bwa Mutoni, Apotre Gitwaza yafashe ijambo asaba abantu bose kudakinisha ubuhamya bw'uyu mukobwa. Yagize ati: "Ibi bintu ntimubikinishe. Ni ibintu bikomeye cyane. Ibyo nababwiye ko turi bwiyambure imyambaro y'ama rumors yose (ibihuha), kuko abarozi ni bo basebya abantu, inkuru ikaba impamo, bakabikora. Baraza bagaca mu bantu, ariko ari imigambi yacuriwe ikuzimu. Uyu mwana (Mutoni) ntabwo muzi, namubonye ngira ngo ejo bundi aje gutanga ubuhamya. Imana yagiye imukorera utuntu tw'ibitangaza twatumye atangira gu Questioning satani, gusa ndagira ngo mbabwire ko satani nta mbaraga agira. Rero tugomba vuba cyane kumubatiza. Biramukuraho amaraso yuhagiwe" Yahise amubaza ati 'Uremeye kubatizwa mu izina rya Data, Umwana n'Umwuka Wera?' Mutoni ati 'Ndabyemeye' (...)
KANDA HANO USOME UBUHAMYA BWOSE BWA MUTONI
Yapfukamye hasi yakira agakiza asengerwa na Apotre Gitwaza
Eng
RSS 
TANGA IGITECYEREZO